Орталық Азияның ең мықты шахматшылары Алматыда бас қосты. 2-10 сәуір аралығында өтетін 3.4 Азия аймағының чемпионаты шахматшылар үшін басты додаға айналып отыр. Бұл сайыс – Батуми мен Нью-Делиде өтетін Әлем Кубогына іріктеу кезеңі. Биыл жарысқа 134 шахматшы қатысып, 7 жолдаманы сарапқа салады.
Аймақтық чемпионат Орталық Азиядағы алты елдің үздік шахматшыларын жинады. Сайыс Қазақстан мен Өзбекстан елдерінің фовариттері Каир Беристенов пен Мухиддин Мадаминовтің алғашқы жүріс қадамдарымен басталды. Бұл чемпионат – шахмат әлеміндегі ең маңызды оқиғалардың бірі болмақ. Өйткені дәл осы жерде спортшылар өз шеберліктерін көрсетіп, әлемдік аренаға жолдама алады.
ГҮЛМИРА ДӘУЛЕТОВА, ҚАЗАҚСТАН ШАХМАТ ФЕДЕРАЦИЯСЫНЫҢ АТҚАРУШЫ ДИРЕКТОРЫ:
Бұл жердегі ең мықты мемлекеттер Қазақстан және Өзбекстан болып табылады. Себебі мен айтып өткенімдей бүкіл әлемдік олимпиадада біздің қыздар 2-ші орын, олардың ерлер командасы 3-ші орын алып отқан болатын. Сондықтанда екі мемлекеттің спортшылары бір бірімен осы 1-ші, 2-ші, 3-ші орындарға таласатын болады. Бірақ сонымен қатар Түрікменстаннан өте мықты командасы келіп отыр.
Жарыстың маңыздылығы – тек бәсекеде емес, шахматшылардың жаңа белестерді бағындыруында. Қазақстан бұл жарысты жоғары деңгейде өткізуге толығымен дайын.
ТИМУР ТУРЛОВ, ҚАЗАҚСТАН ШАХМАТ ФЕДЕРАЦИЯСЫНЫҢ ПРЕЗИДЕНТІ:
Осынау маңызды іріктеу турнирін қабылдау Қазақстан үшін мәртебе, сондықтан ұйымдастырушылар ретінде шахматшылардың қазақтың дәстүрлі қонақжайлығын толық сезінуі үшін қажеттінің бәрін жасаймыз. Әлем Кубогына қатысу үшін өтетін жарыс қызықты болады, демек алдағы уақытта біз тамаша ойындар мен жарқын жеңістердің куәсі боламыз деп күтеміз.
Турнирдің бас серіктесі – Freedom Holding Corp. Сондай-ақ серіктестер қатарында Shymbulak Water , Алматы халықаралық әуежайы және «Атакент» көрме орталығы бар. Алматыда өтіп жатқан бұл дода – шахмат сүйер қауым үшін үлкен мереке. Турнир қорытындысы бойынша үздік шахматшылар Әлем Кубогына жолдама алып, халықаралық аренада өз елдерінің намысын қорғайтын болады.
