«Әлқисса-Нұрғиса» . Елордада көрнекті композитор, күйші, дирижер Нұрғиса Тілендиевтің 100 жылдығына арналған мерекелік шаралар басталды. Қазақ музыкасының дара тұлғасының мерейтойы тек елімізде емес, ЮНЕСКО және ТҮРКСОЙ сияқты беделді ұйымдардың қолдауымен халықаралық деңгейде де аталып өтеді.
Нұрғиса Тілендиев - ұлттық музыканы жаңа белеске көтеріп, қазақ оркестрлік өнерінің дамуына өлшеусіз үлес қосты. Оның "Қыз Жібек", «Менің атым Қожа», «Қарлығаштың құйрығы неге айыр» фильмдеріне жазған музыкасы -қазақ киноөнерінің ажырамас бөлшегі. Сондай-ақ ұлы тұлғаның құрметіне Мемлекет басшысының атынан гүл шоқтары табыс етілді.
ЖҰБАНЫШ ЖЕКСЕНҰЛЫ, ҚАЗАҚСТАННЫҢ ЕҢБЕК СІҢІРГЕН ҚАЙРАТКЕРІ:
Нұрғиса атамыздың әндері менің ойымша ол біздің жүрегімізде, біздің ата-анамыздың жүрегінде. Сндықтан бұл әндер менің ойымша қазақ тұрғанша тұрады.
Мерекелік кеште көрерменге Нұрғиса Тілендиевтің қазақ музыкасының алтын қорына енген «Өз елім», «Құстар әні», «Ата толғауы», «Аққу», «Махамбет» сынды ұлттық рух пен патриотизмге толы шығармалары ұсынылды. Еңбектеген баладан еңкейген қарияға дейін сүйіп тыңдайтын композитор жайлы сіз бен біз білмейтін қызықты ақпараттар да айтылды.
ДІНЗУХРА ТІЛЕНДИЕВА, Н.ТІЛЕНДИЕВ АТЫНДАҒЫ АКАДЕМИЯЛЫҚ ФОЛЬКЛОРЛЫ-ЭТНОГРАФИЯЛЫҚ «ОТЫРАР САЗЫ» ОРКЕСТРІНІҢ КӨРКЕМДІК ЖЕТЕКШІСІ, Н.ТІЛЕНДИЕВТІҢ ҚЫЗЫ:
Ол кісі енді жұмыста қатал болған жарты сағаттың ішінде музыкантты жұмыстан шығарып жарты сағат ішінде қабылдап алатын. Үйде жақсы әке, жақсы күйеу болды. Өте толық қылып жазатын шығарманы, олар жиі түнде шығатын.
Нұрғиса Тілендиевтің 100 жылдығы кең көлемде аталып өтіледі. Ел аумағында 100-ге жуық шара ұйымдастырылмақ. Сондай-ақ, АҚШ-тағы Карнеги-холлда концерт пен көрме болады, Бейжіңде «Құстар қайтып барады» мерекелік кешінде композитордың әндері орындалады.
