Шымкентте үндістандық студент жаттығудан кейін жүрек талмасынан көз жұмды. Бұл туралы Stan.kz ақпарат агенттігі хабарлайды.
Үндістандық India Today басылымының мәліметінше, көз жұмған студенттің есімі Уткарш Шарма, жасы 21-де болған. Ол Раджастхан штатынан Шымкентке келіп, Оңтүстік Қазақстан медицина академиясында медицина мамандығы бойынша білім алып жүрген.
29 наурызда студент спортзалдағы жаттығудан кейін жүрек талмасына ұшыраған. Шарма досына қоңырау шалып үлгереді, досы бірден көмекке келіпті. Алайда студент ауруханаға жете алмай көз жұмған, дәрігерлер оның қайтыс болғанын растады.
Жүрек талмасынан үш сағат бұрын Шарма әпкесімен телефон арқылы сөйлескен. Әпкесіне ол жағдайы жақсы екенін айтып, ешқандай шағымы болмаған.
31 наурызда марқұмның әкесі ұлының денесін алып кету үшін Қазақстанға ұшып келді.
Үндістаннан келген турист қазақстандық ауруханада емделуден бас тартқан: БАҚ біздің елге қорқынышты сапар туралы жарыса жазды
Денсаулық сақтау министрлігі Оңтүстік Қазақстан медицина академиясының 2003 жылы туған студенті 30 наурызға қараған түні көз жұмғанын растады.
"Түнде науқастың жағдайы күрт нашарлаған. Жанында болған студенттер мен көршілері жедел жәрдем шақырған. Алайда, дәрігерлер келген кезде оның қайтыс болғанын анықтады. Оған кардиомиопатия диагнозы қойылды. Марқұмның ата-анасы Қазақстанға келді, ал университет мәйітті бальзамдау және Үндістанға жеткізу шығындарын өз мойнына алды. Ата-анасына көңіл айтылды, олардың ешқандай шағымы жоқ. Бүгін сағат 17:45-те ата-анасы мен студенттің денесі ұшақпен Үндістанға аттанды", – делінген министрлік хабарламасында.
Шымкент қалалық полиция департаменті студенттің өліміне байланысты қылмыстық іс қозғады. Марқұмның зорлық-зомбылық белгілері анықталмаған. Қазіргі уақытта сот-медициналық сараптама тағайындалды.
