Қазақстан мұсылмандары діни басқармасы криптовалютаны, әсіресе биткойнды, шариғат бойынша тыйым салынған деп жариялады, деп хабарлайды BAQ.KZ тілшісі.
ҚМДБ-ның ресми сайтында биткойн ислам қағидаларына қайшы келетіні түсіндіріледі. Өйткені оны ешбір банк, агенттік немесе мемлекеттік орган бақыламайды.
Ұлттық валюталар алтынмен немесе ішкі өніммен қамтамасыз етілген, ал биткойн ештеңемен қамтамасыз етілмеген. Кез келген адам өз қаржы жүйесін жасап, делдалдар мен бақылаусыз операциялар жүргізе алады, – делінген ҚМДБ сайтында жарияланған пәтуада.
ҚМДБ шариғат бойынша ақшаны мемлекет шығарып, оның кепілдігі болуы тиіс екенін баса айтады. Ал биткойн ұлттық валюта болып саналмайды, заңмен қорғалмайды және оның құны тұрақсыз, бұл елеулі қаржылық шығындарға әкелуі мүмкін.
Бұдан бөлек, криптовалюта реттеуші органдардың бақылауынан тыс болғандықтан, заңсыз саудаға, ақшаны жылыстатуға және тыйым салынған ұйымдарды қаржыландыруға ықпал етуі мүмкін. Транзакциялардың анонимділігі алаяқтыққа жол ашады, бұл ислам қағидаларына қайшы келеді.
Белгісіздік, алаяқтық қаупі және жеке адам мен мемлекетке келетін ықтимал зиянға байланысты биткойнға шариғат нормалары бойынша тыйым салынған, – деп қорытындылады ҚМДБ.
