Ұлттық банк азаматтарға алаяқтардың мессенджерлерде жалған немесе пайдаланушылардың бұзылған дербес аккаунттарын пайдаланатын схемалары туралы ескертті, - деп хабарлайды Massaget.kz тілшісі.
"Қаскөйлер мессенджерлерде Ұлттық банк немесе өзге мемлекеттік және құқық қорғау органдары қызметкерлерінің жалған аккаунтын пайдаланады. Ал профиль шынайы көрінуі үшін жалпыға қолжетімді дереккөздердегі, оның ішінде ведомстволардың ресми ресурстарындағы суреттер мен эмблемаларды қолданады", - деп жазылған хабарламада.
Сонымен қатар, алаяқтар өздерін мессенджердің техникалық қолдау қызметінен деп таныстырып, азаматтарға аккаунтын жоюға өтініш беру туралы хабарлама жібереді. Бұл шешімнің күшін жою үшін азаматтарға сайтқа өтуді ұсынады. Онда өз телефон нөмірін көрсетіп, хабарламада көрсетілген бір реттік кодты енгізуді талап етеді. Осылайша олар аккаунтқа иелік етіп, пайдаланушыны бұғаттайды.
"Содан соң қаскөйлер жалған немесе бұзылған аккаунттарды пайдалана отырып, бұрынғы иесінің туыстары мен таныстарына хат жазады және түрлі сылтаумен ақша аударуды, сілтемеге өтуді, қосымшаны жүктеуді, мессенджерде жаңа функцияларды іске қосуды немесе жеке деректерін хабарлауды сұрайды", - деп жазылған хабарламада.
Бұдан бөлек алаяқтар жалақысы жоғары жұмыс туралы хабарламалар таратады немесе қоғамдық орындарда QR кодтар жариялайды. Азаматтар көрсетілген сілтемеге өткен кезде олар сол мезетте мессенджерге, мобильді құрылғыға немесе дербес деректерге қол жеткізеді.
"Ұлттық банк азаматтарды қырағы болуға және жасырын ақпаратты үшінші тұлғаларға хабарламауға, мессенджердегі күдікті хабарлар мен телефон қоңырауларына сенбеуге, ақша аудармауға, күмәнді сілтемелер мен файлдарды ашпауға, сондай-ақ, HopToDesk, RustDesk, RUDesktop, AnyDesk, TeamViewer және т.б. қашықтан қол жеткізуге арналған қосымшаларды орнатпауға шақырады", - деп жазылған хабарламада.
Ұлттық банк мұндай жағдайда ресми органдарға алаяқтық әрекет туралы өз бетінше хабарлауды ұсынды.
"Егер алаяқтардың арбауына тап болсаңыз, Қазақстан Республикасының құқық қорғау органдарына тиісті өтінішпен жүгінуге кеңес береміз", - деп жазылған хабарламада.
