Ақтөбе облысы Қобда ауданының тұрғыны біреудің телефонын ұрлап, қылмыс жасаған баласы үшін қамауға алынды, деп хабарлайды BAQ.KZ тілшісі.
Белгілі болғандай, ауданда тұратын 14 жастағы жасөспірім өз бетімен облыс орталығына келген. Кейін адамдар көп жиналатын жерге барып, бейтаныс адамның ұялы телефонын ұрлап алған. Полиция қызметкерлері жасөспірімді ұстап, ұрланған телефонды тәркіледі. Нәтижесінде жасөспірім профилактикалық есепке алынып, оның ата-анасына хабар берілді.
Биыл 1 сәуірде Қобда аудандық сотында кәмелетке толмаған жасөспірімнің ата-анасына қатысты әкімшілік іс қаралды. Баланы тәрбиелеу, оған білім беру, оның құқықтары және мүдделерін қорғау жөніндегі міндеттерін орындамағаны үшін жасөспірімнің әкесі сот шешімімен кінәлі деп танылды. Қазір әлгі әке бес тәулікке әкімшілік қамауға алынды, - дейді Ақтөбе облыстық полиция департаменті баспасөз қызметінің өкілі Ерболат Сарқұлов.
Айта кету керек, қазір өңірде жасөспірімдер арасында қылмыс саны жылдан-жылға артуда. Осыған орай департамент мамандары ата-аналарды барынша балаларына мұқият қарауға, ата-аналық міндеттерін дұрыс орындауға шақырады. Егер ата-аналар өз міндеттемелерін орындамаса оларға заң аясында жауапкершілік көзделеді.
