Мемлекет қаражатын қадағалау мақсатында биыл 250 млрд-қа жуық цифрлық теңге айналымға енгізілген. Бұл туралы Олжас Бектеновтің қатысуымен өткен бюджет қаражатының мақсатты пайдаланылуын бақылау тетіктерін және цифрлық теңгені енгізу жөніндегі кеңесте айтылды. Пилоттық жоба әзірге сыбайлас жемқорлыққа барынша бейім салаларда сынақтан өтіп жатыр. Аталған әдістің тиімділігі Ақмола облысындағы шаруа қожалықтарының қатысуымен «Ауыл аманаты» бағдарламасын іске асыру барысында қаралған. Нәтижесінде барлық сатып алулар ашық өткен. Бұдан бөлек, пилоттық жоба осы жылы Қарағанды, Павлодар және Атырау облыстарында теміржол және автомобиль жолдарын салу кезінде де жалғасады.
ОЛЖАС БЕКТЕНОВ, ҚР ПРЕМЬЕР-МИНИСТРІ:
Бизнес-үдерістер де өзгеріп, ашық болуы керек. Кәсіпкерлерге қатысты мынадай қағиданы ұстанған жөн: бюджет ақшасымен жұмыс істесеңіз – ашық болыңыз. Оны қайда жұмсайтыныңызды және жеткізушілер мен мердігерлердің толық тізбегін ашып көрсетіңіз. Сондай-ақ цифрлық теңгенің пилоттық жобасын кеңейту қажет.
