Астаналық ерлі-зайыпты 7 жылға бас бостандығынан айырылды. Айыпталушылардың туыстары істі қайта қарауды сұрап отыр. Қазір Нұрсұлтан мен Марияның кәмелет жасқа толмаған екі баласы бар. Сондай-ақ келіншектің үшінші нәрестеге аяғы ауыр. Істің мән-жайын тілшіміз тарқатады.
Елорда тұрғыны Асел Асанова інім мен келінім жазықсыздан жазықсыз сотталып кетті дейді. Оның айтуынша, туысы жеке кәсіпкердің қарамағында жылдар бойы есепші болып жұмыс істеген. Оны кінәлау жұмыстан кетуге шешім қабылдағанда басталған. Айыпталушы тарап сот ұрлық фактісі бойынша нақты айғақтардың жоқтығын, ұсынылған құжаттардың бұрмалануы мүмкін екенін ескермеді, дейді.
АСЕЛ АСАНОВА, АЙЫПТАЛУШЫЛАРДЫҢ ТУЫСЫ:Жолдасын Мария товар алып, менің ініме бергендей, ал інім ол товарды сатқан деп солай ұстап отыр. Бірақ ешқандай оған дәлелі жоқ. Тек ғана партнердің сөзі бойынша «иә, Нұрсұлтан осындай істеді деп сонымен жауып отыр. 7 жылға жауып отыр. Біз онымен келісе алмаймыз.
Асел Асанова келіні жұмыстан кетер алдында барлық хаттамаларды тапсырған және оған қатысты ешқандай шағым болмағанын айтады. Бірақ екі айдан кейін кәсіпкер қаржы жетіспейтінін айтып шағымданған.
АСЕЛ ТОҚАЕВА АЙЫПТАЛУШЫЛАРДЫҢ, АДВОКАТЫ:Бұл қылмыстық іс бойынша 4 жыл бойы қаржы көлемінің әртүрлі болуы көп сұрақ туындатады. Алғашында 11 миллион теңге болса, кейін 72 миллион теңгеден асқан. Соңғы сот отырысында ол 600 мың теңгеге азайған. Бұл істе ең қызығы, әрі түсініксізі – жәбірленушінің тауарлары ұрланғандығы расталмаған. Олар 4 жыл ішінде бұл заттың ұрлық екенін растайтын құжаттарды өзгертіп отырған. Жәбірленуші сотқа ұсынған айналым қаражатының көлемі 1 миллиард теңгеден асқан. Алайда бұл соманың салығы төленбегені анықталды.
Жәбірленуші Руслан Саликов сенім артқан есепшім маңдай термен тапқан табысымды желге ұшырып, ұрлады деп қынжылады. Мария жолдасымен бірге тауарларды елордадағы автобөлшек базарына барып сатты деп айыптайды. Сондай-ақ кәсіпкер жоғалған соманың әркез әртүрлі болуын тергеу кезінде түрлі дәйектерге тап болуымен байланыстырады.
РУСЛАН САЛИКОВ, КӘСІПКЕР:Соңғы кезде тауар алған клиенттерге бәріне звандап шықтық. Насриденова Марияның шотына ақша салып тұрдыңыздар ма? Болды ма сондай жағдай дедік. Олар «иә, болды» деді. Сосын олар бізге скриндерді жіберді. Қай кезде қанша сумма жібергендерін. Ол кезде болғаны 12 млн болды. Ол общий инвентеризация емес, ол өзіміздің тапқанымыз, бөлек, жеке. Документация, аудиторский проверкадан кейін соның бәрін апарып біз полицияға бердік. Содан кейін бағасы басқа болды.
Жалпы айыпталушыға күдік құжат пен тауардың сәйкессіздігі кезінде туындапты. Бұл туралы басшыларға Марияның әріптесі хабарлаған.
МЕРУЕРТ БЕЙСЕНБЕКОВА, КУӘГЕР:Екі-үш айдан кейін байқай бастадым. Почтаға түскен заявкалар 1С-қа көрінбейді. Бірақ товар по факту жиналады және өзіміздің жекеменшік фирманың газельдері бар, жүргізушілері бар біраз жылдан бері істеп жүрген солар арқылы артып жібереді.
Аталған іс бойынша Астана қалалық қылмыстық істер жөніндегі ауданаралық сотына хабарластық.
АЛИНА РАЙЫМБАЕВА, ҚАЛАЛЫҚ СОТЫ БАСПАСӨЗ ҚЫЗМЕТІНІҢ БАСШЫСЫ: Аталған іс қазіргі таңда апелляциялық сот алқасында. Тараптардың барлық дәлелдемелері жоғары тұрған сатының сот отырысында, яғни апелляциялық сатыда заң шеңберіне сәйкес қаралатын болады.
Төрт жылға созылған іс биыл ақпан айында аяқталған. Енді апелляциялық сот 15 сәуірде өтеді.
