Ақтөбеде ондаған тұрғын Бали мен Малазияға саяхаттаймыз деп сан соғып қалды. Олар бір авторлық турдың иесімен саяхат туралы келісіп, миллиондарын аударған. Бірақ белгіленген уақытта не тур жоқ, не ақша жоқ болып шығыпты. Алданған тұрғындар оның енді заң алдында жауапқа тартылуын талап етуде.
Бұл тұрғындар қаңтарда Малайзия мен Балиге саяхатқа баруы тиіс болған. Жарнамасы жер жарған авторлық турды олар әлеуметтік желі арқылы көріп, Орал қаласының тұрғынынан сатып алған. Бір миллион теңгеге жуық ақшасын үш отбасы да толық аударып жіберген. Алайда, ешқандай саяхатқа бармапты.
АРМАН САБЫРОВ, ҚАЛА ТҰРҒЫНЫ:
Сонымен келісіп, Тур Малазияға, содан кейін Балиге ұшу керек едік. Алматыдан. Бірақ біз Алматыға келуімізге байланысты Салтанат өз телефонын сөндіріп тастап, байланысқа шықпай қалды. Яғни біз ақшасын заранее төлеп қойғанбыз. Бізге екі күннен кейін байланысқа шығып тұр. Сіздің ақшаларыңызды қайтарамын ренжімеңіздер тур болмай қалды деді. Алайда үш ай өтті. Ақшамызды қайтарған жоқ.
МИРА БАҚТЫҒАЛИҚЫЗЫ, ҚАЛА ТҰРҒЫНЫ:
Өзі Меккеде болған екен инстрграмында. Адам алдамаймын намаздамын деп қаншама отзыв қарап алғанбыз біз билетті. Оказывается жалғыз біз емес екен алданған. Бізді чатқа қосады. Чатта 65 адам бар. Олар список жазады қаншама қарыз екенін. Балиға ұшып сол жақта алданғандар да бар екен. Ол қыз әлі жұмыс істеп, халықты алдап жатыр.
Жалпы жетпіске жуық адам осы авторлық турға алданған. Шығын көлемі әзірге 30 миллион теңге шамасында. Тұрғындардың айтуынша, қазір авторлық турдың иесі шетелде жүрген көрінеді. Сондықтан ол кісімен хабарласу да мүмкін емес дейді.
Алданған тұрғындар полицияға арызданған. Қылмыстық іс қозғалды.
ЕРБОЛАТ САРҚҰЛОВ, ОБЛЫСТЫҚ ПД БАСПАСӨЗ ҚЫЗМЕТІНІҢ ЖЕТЕКШІСІ:
Қазіргі таңда екі немесе одан да көп адамға қатысты алаяқтық жасау дерегі бойынша туристік агенттік иесіне қатысты қылмыстық іс қозғалды. Жәбірленуші ретіңде үш отбасы өтіп жатыр. Қазіргі уақытта күдіктінің жеке басы анықталды. Ұстауға бағытталған іс шаралар жүргізілуде.
Тергеудің қашанға дейін созылары белгісіз. Енді алданған тұрғындардың күтуден басқа амалы жоқ.
