Бұл - Американың экономикалық тәуелсіздігінің күні». Осындай ұранмен Дональд Трамп ақыры кедендік баж салығын енгізді. Жаһандық «сауда соғысы» Қазақстанды да айналып өтпеді. Тарифтер көп ұзамай күшіне енеді. Сондай-ақ АҚШ Президентінің арнайы уәкілі Стив Уиткофф Владимир Путиннің уәкілімен кездесті. Саясаткерлер не жөнінде әңгімелесті? Мөлдір Жақан тарқатады.
Қайырлы кеш! Эфирде - "Жер-жаһан" айдары.
Дүйім жұрттың назары әдеттегідей Трампта. АҚШ Президенті күллі әлемге «сауда соғысын» жариялады.185 елден баратын тауарларға кедендік баж салығын енгізді. Мұндай қатаң шараларды қабылдайтынын Дональд Трамп соңғы бірнеше ай бойы айтып жүрген еді. Ақыры тиісті жарлыққа қол қойды. Тізімде біздің ел де бар. Қазақстанға қатысты Орталық Азиядағы ең жоғары 27%-дық мөлшерлеме белгіленді. Еуроодақ және Канада, Қытай сияқты бірқатар елдер АҚШ Президентінің бұл ісіне қарсылықтарын білдіре бастады. Ал Трамп бұл шараларды - саудадағы әділеттілікті қалпына келтіру деп атады. Американы қайтадан ұлы және бай қыламын деп шырылдап жүрген ол АҚШ 50 жылдан астам уақыт бойы тоналып келгенін айтты.
ДОНАЛЬД ТРАМП, АҚШ ПРЕЗИДЕНТІ:
Бұған дейін біз ешкімге салық салмағанбыз, енді бәрі басқаша болады. Алыс-жақын елдердің бәрі бізді алдап келді, американдық арманымызды ұрлады. Шетелдіктер жұмыс орындарымыз мен зауыттарымызды тоңады. Американдық болат өңдеушілері, көлік өндірушілері, шаруалары мен қолөнершілері қатты зардап шекті.
Трамп соңғы бір ғасырда болмаған шектеулерді енгізіп, жұртты дүрліктіріп жатқанда, оның арнайы уәкілі Стив Уиткофф Владимир Путиннің уәкілі Кирилл Дмитриевпен кездесті. Америка билігі Кирилл Дмитриевтің ел аумағына кіруге виза алуы үшін оған қарсы санкцияларды да тоқтатқан. Вашингтондағы жүздесу кезінде тараптар Украинадағы соғысты тоқтатуға қатысты келіссөздер жүргізді. Алайда олардың нақты қандай шешімге келгені әзірге белгісіз. Дегенмен, Кирилл Дмитриев әлеуметтік желідегі парақшасында жазба қалдырды.
КИРИЛЛ ДМИТРИЕВ, РЕСЕЙДІҢ ТІКЕЛЕЙ ИНВЕСТИЦИЯЛАР ҚОРЫНЫҢ БАСШЫСЫ:
Бүгінде әлемнің көптеген елдерінде сындарлы өзара іс-қимылды қалпына келтіру жолында шиеленісті сақтауға мүдделі күштер тұр. Бұл күштер Ресейдің позициясын саналы түрде бұрмалайды. Диалогқа кез — келген қадамды бұзуға тырысады, оған қаражат пен ресурстарды аямайды.
Ал Мьянмадағы 4 жыл бұрын басталған азаматтық соғыс уақытша тоқтатылды. Оған себеп - жақында болған жойқын жер сілкінісі. Табиғи апаттан қаза тапқандар саны 3 мыңнан асты. 4,5 мың адам зардап шекті. Мьянманың билеуші армиясы құрбандарға «жанашырлық белгісі ретінде» бітім жариялады. Әскери іс-қимылдардағы үзіліс 22 сәуірге дейін созылады.
Құрметті көрермен, мендегі ақпарат осы. Келесі аптада жүздескенше!
