Солтүстік Қазақстанда ауыл мектебінің төбесі майысып, оқушылардың үрейін қашырған. Қызылжар ауданындағы Белое ауылының орта мектебі өткен ғасырдың алпысыншы жылдары бой көтерген. Бірақ содан бері жөндеу көрмепті. Білім ошағының бағаналары шіріп, төбесі қисайып кеткен. Ата-аналардың айтуынша, басшылық бірнеше жылдан бері ахуалы мүшкіл ғимараттың жыртығын жамап келеді. Сондықтан олар балалардың өміріне алаңдап отыр. Аталған мектепте бүгінде 110 бала білім алып жатыр.
СВЕТЛАНА АРИФУЛИНА, АТА-АНА:
Бұл мектептің салынғанына 61 жыл болды. Оны жөндей беруден нәтиже шықпайды. Біз үшін оқушылардың қауіпсіздігі маңызды! Сондықтан жаңа мектептің салынғанын қалаймыз.
Апатқа байланысты билік тарапы еске мектепті уақытша жауып, балаларды жақын маңайда орналасқан Пеньково елді-мекенінің білім ошағына тасуға бел буды. Оқушылар үшін екі ауылдың арасында арнайы автобус қатынап тұрмақ. Ал ескі ғимарат үш жыл бұрын сараптамадан өтіп, “апатты емес” деген қорытынды шығарылған. Енді мердігер компания бұл нысанды тағыда күрделі тексерістен өткізбек.
Айнагүл СҰРАҒАНОВА, СҚО БІЛІМ БАСҚАРМАСЫНЫҢ БАСШЫСЫ:
Оны енді сараптама көрсетеді. Сараптама қандай қорытынды шығарады. Соған қарай жұмысты жалғастырамыз. Егер күрделі жөндеу қажет етеді деген сараптама шығатын болса, онда жөндейміз. Егер сараптама мектепті қолданысқа беруге болмайды, апатты болатын жағдайда онда тағы басқа шешімдерді қарастырамыз.
