Еуропалық реттеушілер Илон Маскқа тиесілі X әлеуметтік желісіне (бұрынғы Twitter) дезинформациямен күрес және заңсыз контентке қатысты заңды бұзғаны үшін «қатаң санкциялар» енгізуді жоспарлап отыр, деп хабарлайды Azattyq Rýhy.
The New York Times газетінің хабарлауынша, талқыланып жатқан шаралардың арасында ірі айыппұл бар.
Газет ЕО мен АҚШ арасындағы қарым-қатынаста X-ке салынатын ықтимал айыппұл «шиеленісті одан әрі күшейте түседі» деп атап өтеді, өйткені бұл санкциялар АҚШ президенті Дональд Трамптың жақын кеңесшілерінің біріне бағытталмақ. Айыппұл туралы шешім 2025 жылдың жазында жарияланады деп күтілуде.
Айыппұлмен қатар, еуропалық реттеушілер X-тен «өнімге өзгерістер енгізуді» талап етпек. Нақты қандай өзгерістер туралы айтылғаны әзірге нақтыланбаған.
Газеттің әңгімелесушілерінің айтуынша, ЕО билігі Масктың әлеуметтік желісіне қаншалықты үлкен айыппұл салу керектігін әлі де таразылап жатыр. Дереккөздердің бірі айыппұлдың көлемі бір миллиард доллардан асуы мүмкін екенін айтады. Оның пікірінше, реттеушілер осылайша басқа компанияларды заңды бұзудан сақтандыруды көздейді.
Еске салсақ, X-ке қатысты тергеу 2023 жылы басталған еді. 2024 жылдың жазында Еурокомиссия әлеуметтік желі ЕО-ның Цифрлық қызметтер туралы заңының (Digital Services Act, DSA) бірқатар баптарын бұзғанын мәлімдеді. ЕО-ның пайымдауынша, X «көк белгі» бар «верификацияланған аккаунттар» үшін интерфейсті дұрыс әзірлемейді және пайдаланбайды, бұл қолданушыларды шатастырады.
Мұндай аккаунтты «кез келген адам» сұрай алатындықтан, қолданушылар профильдердің шынайылығы мен онда жарияланған контенттің дұрыстығына күмән келтіруі мүмкін. Сонымен қатар, ЕК X-тің жарнама мөлдірлігі талаптарын сақтамайтынын және зерттеушілерге жалпыға ортақ деректерге қолжетімділік бермейтінін айтқан.
