Алматыда жұмысшы мамандықтар жылына орай «Тайқазан» халықаралық кәсіби шеберлік фестивалі өтті. Қатысушылар ұлттық тағам түрлері мен ұлттық киім үлгілерін заманауи стильде ұштастырып, ерекше жобалар ұсынды. Үздіктер марапатталды.
Мұндай шара Алматы облысында тұңғыш рет ұйымдастырылып отыр. Жас мамандарды экономиканың өндірістік секторына бейімдеуге негізделген фестивальде еліміздің 12 өңірінен жиналған 100-ден аса қатысушы бақ сынады. Ал, таланты мен талабы жарасқан жастардың еңбегін Түркия, Италия, Сауд Арабиясы, Ресей сынды елдерден келген 25 халықаралық кәсіби сарапшылар бағалады.
САЛТАНАТ БЕСПАЕВА, ОБЛЫСТЫҚ БІЛІМ БАСҚАРМАСЫНЫҢ БАСШЫСЫ:
Негізгі түп мақсатымыз – жұмысшы мамандықтар ішінде аспазшы және тігін мамандығындағы оқып жатқан студенттерімізге ұлттық асты дәріптеу, өзінің мамандығына деген сүйіспеншілікті ояту.
БАҚЫТГҮЛ КІШІБАЕВА, ОБЛЫСТЫҚ ҚЫЗМЕТ КӨРСЕТУ ЖӘНЕ ТАМАҚТАНДЫРУ САЛАСЫНДАҒЫ ИННОВАЦИЯЛЫҚ ТЕХНОЛОГИЯЛАР КОЛЛЕДЖІНІҢ ДИРЕКТОРЫ:
Тамақтануды ұйымдастыру мамандығы бойынша 90-ға жуық білім алушы қатысты және ұлттық киімді дәріптеу мақсатында Кербез фэшн байқауы ұйымдастырылды. Кербез фэшн байқауына 10 колледжден келіп білім алушылар қатысты.
Командалық және юниор мен ересектер арасында «Тамақтандыруды ұйымдастыру» мамандығы бойынша Алматы, Астана, Түркістан, Павлодар, Абай облысының қатысушылары жеңіске лайық деп танылды. Ал, «Тігін өндірісі және киімдерді модельдеу» мамандығы бойынша Алматы, Түркістан, Маңғыстау облысының студенттері көш бастады.
ЖАННА ӘБДІРОВА, ҚАЗЫҒҰРТ АУДАНЫ №11КОЛЛЕДЖІНІҢ ӨНДІРІСТІК ОҚЫТУ ШЕБЕРІ:
Біз «Тайқазан-2025» фестивальде бас жүлдені, бірінші орынды алдық. Біздің тақырыбымыз – «Ұлттық десерт». Саумалдан десерт дайындадық және ұлттық ескірген тағамдарды жаңа заманмен үйлестіру болды.
«Тайқазан» фестивалі аясында өткен «Кербез фэшн» киім дизайнерлері байқауының таңдаулы жеңімпаздары келесі жылы Францияда өтетін дефиледе өнер көрсетеді.
