Саран қаласында 30 мың теңге үшін азық-түлік дүкенінің сатушысын өлтіру ісіне қатысты тергеу аяқталды, деп хабарлайды Azattyq Rýhy.
Бұл туралы Қарағанды облысы полиция департаментінің баспасөз қызметі хабарлады. Бұл іс бойынша күдікті Қарағанды қаласының 50 жастағы тұрғыны. Ол азаматтығы жоқ адам.
Ер адам үйленген, ауыр қылмыс жасағанға дейін Қарағанды қаласындағы жауапкершілігі шектеулі серіктестігінде құрылыс мамандығы бойынша жұмыс істеген.
«Іс материалдары қылмыстық істер жөніндегі мамандандырылған ауданаралық сотқа жіберілді», - деп хабарлады ведомствоның баспасөз қызметі.
Ол 10 жылдан 15 жылға дейін бас бостандығынан айырылуы мүмкін.
Еске салайық, жантүршігерлік оқиға 22 қаңтарда болған. Қайғылы оқиға бейнебақылау камерасына түсіп қалған. 27 жастағы әйел оқиға орнында қайтыс болды, артында екі баласы қалды.
Кейінірек ер адам өлтіру ниеті болмағанын айтты. Ол сатушыны қорқытқысы келген, одан қарсылық күтпеген көрінеді. Сол күні таңертең, яғни 22 қаңтарда ол Қарағандыдан таксимен Саран қаласына келген.
Бірақ жол ақысын төлеуге ақшасы болмаған. Содан кейін ол такси жүргізушіге телефонын уақытша қалдырып, жолақысын әкеліп беруге уәде еткен. Ол телефонын қайтарып алу үшін Саран қаласына кіреберістегі дүкенді тонамақ болған.
Дүкенде күзет болмаған. Ол кассадағы ақшаны алуға ешкім кедергі болмайды деп ойлаған.
