Шымкентте Тұран-1 шағын ауданында 1-сынып оқушысы су толы қоршалмаған құрылыс шұңқырына құлап кетіп, көз жұмды. Қайғылы оқиға 12 сәуірде болды. Бұл туралы Otyrar.kz сайты хабарлайды.
Басылымның мәліметінше, жеті жасар бала сағат 17:00 шамасында үйінен шығып кеткен, өкінішке қарай, бірнеше сағаттан кейін, шамамен 22:00-де оның денесі екі метрдей тереңдікте су толған шұңқырдан табылды.
Жергілікті тұрғындардың айтуынша, көпқабатты үйлерге арналған септик шұңқыр бірнеше жыл бұрын қазылған. Бірақ жұмыс орта жолдан тоқтап, шұңқыр сол қалпы ашық қалған. Уақыт өте келе шұңқыр ағынды суға толып қалған.
Тұрғындар қауіпті аумақты қоршау туралы өтінішпен жауапты органдарға бірнеше рет хабарласқанымен, ешқандай шара қолданылмаған. Жақын жерде мектеп пен балабақша бар. Ал бұл орын әлі күнге дейін ата-аналарды алаңдатып келеді.
Баланың денесі сот-медициналық сараптамаға жіберілді. Қазір тергеу амалдары жүргізіліп жатыр.
