The New York Times басылымының мәліметінше, АҚШ президенті Дональд Трамптың әкімшілігінде және Конгрессте Украинаға болашақта әскери көмек көрсету мәселесі бойынша маңызды талқылаулар іс жүзінде жүргізіліп жатқан жоқ, деп хабарлайды BAQ.KZ.
Еуропалық шенеуніктердің айтуынша, Америка Құрама Штаттары әлі күнге дейін Украинаға барлау деректерін беруді жалғастыратынын нақты растамаған. Бұл мәліметтер Украинаның Ресей армиясына және жау инфрақұрылымына тиімді шабуыл жасауына шешуші рөл атқарады.
Журналистердің жазуынша, Трамп командасы қазіргі таңда Украинамен қарым-қатынасы туралы көп айтпайды. Керісінше, олар көбіне өздері не ала алады деген сұрақты талқылап, Украинаға не бере алатыны туралы емес, өз мүддесіне не пайдалы болатынына басымдық беріп отыр.
Ақ үйдегі үлкен жанжалдан кейін Киев пен Вашингтон арасында АҚШ инвестициялары және Украинадағы пайдалы қазбаларға қол жеткізу туралы келісім қызу талқылануда.
Айта кетейік, соңғы бір жарым айда тараптар осы келісімді қайта-қайта түзеткен, алайда оны 2025 жылдың 28 ақпанында жоспарланғандай қол қоюға үлгермеген.
The New York Times жазуынша, Трамптың шын мәнінде ұмтылып отырған келісімі — Ресеймен бейбіт келісім. Алайда мұндай келісімге қол жеткізу үшін Украина мәселесін айналып өту керек — яғни атысты тоқтату туралы жариялау немесе бұл проблеманы уақытша ысырып қою қажет.
