Ауғанстан билігі 1979 жылдан бері алғаш рет ұлттық халық санағы науқанын өткізуге ниетті және бұл мәселе Ауғанстан министрлер кабинетінің отырысында басты мәселе болды, деп хабарлайды РИА Новости.
Дүйсенбі күні премьер-министр Мұхаммед Хасан Ахундтың төрағалығымен өткен отырыста жалпыұлттық санақты өткізудің ұсынылып отырған негіздері талқыланды.
— Министрлер кабинеті Ұлттық статистика және ақпарат агенттігіне (NSIA) халық санағы жоспарының жобасын мұқият зерделеуді және үкіметтің келесі отырысына қорытынды есепті ұсынуды тапсырды, — делінген хабарламада.
NSIA директоры Абдул Қадырға ұсынысты бағалау және санақ жоспары туралы жан-жақты есеп дайындау үшін арнайы кеңес шақыру тапсырылды.
Ауғанстан бойынша нақты демографиялық деректер, соның ішінде әртүрлі этникалық және әлеуметтік топтар жайлы анық мәліметтер жоқ. NSIA мәліметтері бойынша, 2023-24 жылдары Ауғанстан халқының саны 35,7 миллионға жеткен болуы мүмкін. Алайда, БҰҰ-ның кейбір институтының бағалауы бойынша, 41,4 миллион адамға жетуі мүмкін.
Ауғанстандағы соңғы ұлттық халық санағы 1979 жылы жүргізілді және қауіпсіздік мәселесіне байланысты ел аудандарының 67%-ын ғана қамтыды, ол елге кеңес әскерлерінің шектеулі контингентінің кіруімен үзілді.
