Оралдық екі жасар сәби Зейін Аргенұлы елімізде жоқ ауруға шалдыққан. Отандық дәрігерлер мұндай генетикалық ауыр дерттің Қазақстанда бұрын-соңды мүлдем кездеспегенін айтып дағдарып отыр. Сондықтан науқас баланы нақты емдеу амалы да жоқ екен. Ал ата-анасының айтуынша, бүлдіршінді шетелде емдетуге болады, бірақ ол үшін 1 миллиард 400 миллион теңгедей ақша керек...
Бір айдан кейін екі жасқа толатын Зейін тәй-тәй басып жүру түгілі, денесін ұстай алмайды, тамақ ішуі де қиын. Ауыр дертпен алысқан ата-анасының айтуынша, уақыт өткен сайын баланың жағдайы нашарлап барады. Олардың ендігі үміті - көрші елде жасалатын операция. Бірақ бұған 2 миллион еуро керек.
АРГЕН ҒҰБАШЕВ, ЗЕЙІННІҢ ӘКЕСІ:
Сөйлей алмайды, тіпті басын да ұстай алмайды. Кей-кейде тыныс алуы нашарлап, тамақ қабылдай алмайтын жағдайлар да болып жатады. Көздері криз ұстап жатады, түнгі уақытта кейде ауа концентратын пайдаланамыз. Сбор ашқан уақыттың өзінде 2 миллион еуро бір мезетте жиналмайды халықтан қандай қолдау болса да.
Күрделі операция баланың миына жасалып, арнайы препарат егіледі. Содан кейін мида дофамин түзіліп, сәбидің тыныс алуынан бастап, өсіп-дамуы біртіндеп қалыпқа келеді. Бірақ отандық мамандар шарасыздық танытып отыр. Өйткені мұндай дерт елімізде бұрын-соңды тіркелмепті. Сондықтан дәрі түгілі, емдейтін қондырғы да, маман да жоқ.
РИММА ЗАЙНУЛЛИНА, БҚО КӨПБЕЙІНДІ БАЛАЛАР АУРУХАНАСЫНЫҢ БАС НЕВРОЛОГЫ:
Сарапшылар комиссиясы баланың миына арнайы препаратты енгізу арқылы емдеу керек деген шешімге келді. Қазір бала Оралда, дәрігерлердің бақылауында. Бұл сирек кездесетін дерт Қазақстанда алғаш рет тіркеліп отыр. Әрі қолданылатын препарат та елімізде тіркелмеген. Сондықтан шетелдік мамандарды тарту керек.
Әлемде мұндай дертпен 140 бала ауырады. Көршілес Ресейдің өзінде осындай 5 бүлдіршінге операция жасалып, саулығы түзелген. Сондықтан уақыт оздырмай Зейінді тезірек емдету керек, дейді мамандар. Енді ата-анасы мемлекет көмегіне мұқтаж.
