Сыртқы сауда қызметі және халықаралық экономикалық ұйымдарға қатысу мәселелері жөніндегі ведомствоаралық комиссия еліміздің аумағынан ірі қара малдың бұқаларын үш ай мерзімге уақытша экспорттауға тыйым салу туралы шешім қабылдады. Бұл туралы АШМ баспасөз қызметіне сілтеме жасай отырып El.kz ақпарат агенттігі хабарлайды.
Ауыл шаруашылығы министрлігінің 2025 жылғы 14 мамырдағы №158 және Қазақстан Республикасы Қаржы министрлігінің 2025 жылғы 14 мамырдағы №227 бірлескен бұйрығының бұқаларды экспорттауға тыйым салу бөлігі 2025 жылғы 15 мамырдан бастап күшіне енді, - делінген мәліметте.
Ведомство бұл шара еліміздегі азық-түлік тұрақтылығын қамтамасыз ету және өңдеуші кәсіпорындардың жұмысын жандандыру үшін қолға алынғанын еске салды.
