Мемлекет басшысының тапсырмасына сәйкес, Сыбайлас жемқорлыққа қарсы іс-қимыл агенттігі елімізде заңдылық пен әділеттілік қағидаттарын нығайту бағытындағы жұмысын жалғастыруда. Бұл жолы Тараз қаласының құрылыс саласына қатысты сыбайлас жемқорлық фактісі әшкереленді, деп хабарлайды Azattyq Rýhy.
Қылмыстық іс: екі тұлға сотталды
Антикордың мәліметінше, Тараз қалалық соты қалалық құрылыс бөлімінің басшысы Нұрбол Қалдыбаевты және мердігер ұйымның өкілі Олжас Ерболатұлын соттады.
Қалдыбаев – әлеуметтік осал топтарға арналған көпқабатты тұрғын үйлер құрылысына бөлінген қаражат бойынша жалған актілерге қол қойып, заңсыз ақша аударған.
Ерболатұлы – мемлекеттік қаражатты жымқырғаны үшін кінәлі деп танылды.
Мемлекетке келтірілген зиян – 519 млн теңге
Тергеу нәтижесінде анықталғандай, олардың заңсыз әрекеттерінің салдарынан мемлекетке 519 миллион теңгеден астам шығын келтірілген.
Сот үкімі және қосымша жазалар
«Нұрбол Қалдыбаев – 4 жыл бас бостандығынан айырылды және мемлекеттік қызметте өмір бойы қызмет атқару құқығынан айырылды.
Олжас Ерболатұлы – 6 жылға сотталып, қаржы бөлуге байланысты лауазымдарды атқаруға 10 жылға тыйым салынды», - делінген Антикор хабарламасында.
Заңды күшіне енбеген үкім
Аталған сот үкімі әзірге заңды күшіне енген жоқ.
ҚР Конституциясының 77-бабы 3-тармағы және Қылмыстық-процестік кодекстің 19-бабы негізінде, адам соттың заңды үкімі шыққанға дейін кінәсіз деп есептеледі.
