Аршалы ауданына қарасты Жалтыркөл ауылы маңында орналасқан шаруа қожалығында бақташы болып жұмыс істеген Өзбекстан Республикасы азаматының мәйіті табылды, деп хабарлайды turkystan.kz.
37 жастағы ер адам 1 маусым күні шамамен сағат 17:00-де мал бағуға шығып, байланысқа шықпай қалған. Жұмыс берушісі дабыл қаққан, себебі көл маңынан ерттелген жылқы, оның кепкасы, ұялы телефоны және ер-тоқымға төселетін төсеніш табылған. Ал малшының өзі жанында болмаған.
"Ақпарат түскен бойда Аршалы аудандық полиция бөлімінің қызметкерлері жедел-іздестіру іс-шараларына кірісті. Іздеу топтары ұйымдастырылды. Іздеуге жергілікті тұрғындар мен еріктілер де белсене қатысты, олар көл маңын және жақын маңдағы аумақтарды тексерді. 3 маусымда іздестіру жұмыстары барысында полицейлер ер адамның денесін оның жеке заттары табылған жерден шамамен бір шақырым қашықтықта анықтады. Алдын ала болжам бойынша, өлім себебі – жылқыдан құлап, жануардың адамды белгілі бір қашықтыққа сүйреп апаруы болуы мүмкін. Қасақана өлтіру белгілері табылған жоқ", – деп хабарлады Ақмола облыстық полиция департаментінің баспасөз қызметі.
Қайтыс болу себебін нақты анықтау үшін сот-медициналық сараптама тағайындалды.
