Таразда заңгер 150 ге жуық жұртты тақырға отырғызып кетті. Ол құқықтық қолдау білдіремін деп бұқараны 100 млн теңгеге сан соқтырып кеткен. Әккі әйелді тергеуге бір жыл уақыт кеткен. Енді барлық қылмысы әшкере болып, алты сыбайласымен жасаған алаяқтығы ашылды. Заңгер әуелі Тараздан кең кеңсе жалдап, ірі кәсіпкер болып өзін таныстырған. Қайтарымсыз несие алып беремін деп үнемі үндеу жасап жүріп, жұртты жалған жарнамасына сендірген. Ол өзінің өтірік хабарламасын ауыл арасына қатынайтын шопырлар арқылы ауылдық жерлердегі жұртқа жайған. Сенім сейілмес үшін, сыбайластарымен қажетті сертификаттарды сайлап, кеңсесіне іліп қойған. Оны көріп арбауға ерген ауыл азаматтары бар құжатын қолына алып кеңсесіне кезекке тұрған. Осылайша әккі заңгер алдына келген адамның атына несие алып, 50 пайыз қаржысын қалтасына басып отырған. Ең сорақысы ол жымысқы ойын екі жыл бойы жүзеге асырып келген. Кейін тақырға отырған тұрғындарға банктен қоңыраулар түсе бастағанда құзырлыларға жүгінген. Сөйтсе талай жыл Таразға танымал заңгер болып еңбек еткен күдікті көпті алдап жүргені әшкере болған. Қазір үй қамағында отыр. Енді жасаған қылмысы толық дәлелденсе 7 жылға бас бостандығынан айрылмақ.
БАҚЫТЖАН ЖЫЛКЕЛДИЕВ, ОБЛЫСТЫҚ ПРОКУРАТУРАСЫНЫҢ БАСҚАРМА ПРОКУРОРЫ:
Бізде заңнамаға сәйкес ешқандай мекеме қайтарымсыз несие бермейді. Бұл бізде 190 баптың 3 бөлігі 4 тармағы. Яғни бізде интернет алаяқтық. 7-ден 10 жылға дейін бас бостандығынан айыру жазасы көзделген. Алайда шектеу жазасы да қолданылуы мүмкін.
