Иа, алаяқтардан айла артылмай тұр. Былтырғы көрсеткіш бойынша елімізде интернет-алаяқтар саны 45 мыңнан асты. Онлайн несие рәсімдеу, жалған сауда платформалары мен фишинг сілтемелер арқылы азаматтардың ақшасы қолды болуда. Бұл мәселені Мәжіліс қабырғасында да бірнеше рет көтерген депутаттар енді нақты әрекет талап етіп отыр. «AMANAT» партиясы фракциясының мүшесі Самат Нұртаза Бас Прокурорға депутаттық сауал жолдап, интернет-алаяқтықпен күресті күшейтуді сұрады.
САМАТ НҰРТАЗА. ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Менің қолыма 18 азаматтың қолы қойылған ұжымдық арыз келіп түсті. Аталған фактіде заңнама көзделген алаяқтық белгілері анық байқалады. Осыған байланысты арыз иелері құқық қорғау органдарына жүгінгенімен оларға "Іс қозғауға негіз жоқ", - деп арыздарын тіркеуден бас тартқан. Осылайша азаматтардың заң аясында өз құқығын қорғау мүмкіндігі өрескел бұзылуда. Ел көлемінде осындай инфосығандардың құрығына түсіп, алаяқтарға жем болып жүрген адамдар қаншама. Сондықтан әлеуметтік желі арқылы тренинг, курс, семинар т.б. қызмет ұсынатындарды жіті тексеріп, олардың іс-әрекетін заңнама арқылы реттейтін кез әбден пісіп жетті.
