Интернет платформаларынан сатып алған затыңыз 200 доллардан асса операторға декларация құнын төлейсіз. Мәжіліс Еуразиялық экономикалық одақтың Кеден кодексін жетілдіретін хаттамасын ратификациялау туралы заңды қабылдады. Одан бөлек, салық кодексі де мақұлданды. Енді оған Мемлекет басшысы қол қойса заң келер жылдың 1-қаңтарынан бастап күшіне енеді.
Мәжілістің үшінші сессиясының жұмысы аяқталды. Осы кезеңде 39 жалпы отырыс өткізіліп, 249 мәселе қаралды. 90 заң қабылданды. Бұл туралы төменгі палата спикері Ерлан Қошанов айтты. Сессия барысында Мемлекеттік органдардың лауазымды қызметкерлері атына 461 депутаттық сауал жолданды. Соның арқасында көпті толғандырған өзекті мәселелер шешімін тапты. Міндетті әлеуметтік медициналық сақтандыру жүйесіне қатысты тәсілдер қайта қаралды. «Келешек» бірыңғай ерікті жинақтау жүйесінің заңнамалық негізі қаланды. Депутаттардың қызметіндегі басты бағыт «Заң мен тәртіпй қағидатын заңнамалық тұрғыдан одан әрі іске асыру болды.
ЕРЛАН ҚОШАНОВ, ҚР ПАРЛАМЕНТІ МӘЖІЛІСІНІҢ ТӨРАҒАСЫ, «AMANAT» ПАРТИЯСЫНЫҢ ТӨРАҒАСЫ:
Адамның бет-әлпетін танып-білуге кедергі келтіретін киім киюге тыйым салынды. Жауапкершілікті күшейтумен қатар, депутаттар ізгі шешімдер қабылдау қажеттігін де ұмытқан жоқ. Кейбір азаматтардың абайсыздан, қиын өмірлік жағдайда жүріп құқықбұзушылыққа баратыны белгілі. Сондықтан біз есірткі таратушылар мен өндірушілер арасындағы қылмыстық жауаптылықтың ара-жігін ажыраттық. Бұл Мемлекет басшысының Ұлттық құрылтайда берген тапсырмасы болатын. Қазірдің өзінде алғаш рет сүрініп, есірткі жасырған жас азаматтарға қатысты үш мыңнан астам іс қайта қаралып, оларды босату мен үкімді жеңілдету бағытында жұмыс жүргізіліп жатыр.
Төменгі палата көтерген өзекті мәселенің бірі - Салық кодексі. Сенат депутаттары Салық кодексіне енгізген өзгерістер мәжілісмендер тарапынан қолдау тапты. Сенаторлар 131 түзету ұсынған, оның 41-і жаңа нормалар, 70 позиция бойынша мәтін, өтпелі ережелер мен нормативтік құқықтық актілерді енгізу мерзімдері нақтыланған. Ал 20-сында саладағы әкімшілендіру бойынша нормалар нақтыланды.
БЕРІК БЕЙСЕНҒАЛИЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Ілеспе заң бойынша Сенат 35 позиция енгізді. Олар редакциялық және нақтылау сипатына ие, сондай-ақ Қазақстан Республикасының жекелеген заңнамалық актілеріне, оның ішінде Сенат енгізген түзетулерге сәйкестікке келтіруді көздейді.
Қабылданған құжат бойынша қосымша құн салығы 12-ден 16 пайызға өседі. Алкаголь мен темекіге акциздер көтеріледі. Энергетикалық сусындарға да жаңа акциз енгізіледі. құны 75 млн теңгеден асатын көліктерге және құны 100 млн теңгеден асатын яхта мен ұшақтарға 10% акциз енгізіледі. Құны 450 млн теңгеден асатын жылжымайтын мүлікке 2% салық салынады. Одан бөлек, Мәжіліс қабылдаған заңның бірі Еуразиялық экономикалық одақтың Кеден кодексі туралы шарт. Енді интернет арқылы алған затыңыз 200 доллардан асса, операторға декларация құнын төлейсіз.
СЕРІК ЖҰМАНҒАРИН, ҚР ПРЕМЬЕР-МИНИСТРІНІҢ ОРЫНБАСАРЫ – ҰЛТТЫҚ ЭКОНОМИКА МИНИСТРІ:
«Электрондық сауда операторы» ұғымын енгізу ұсынылып отыр. Сондай-ақ, электрондық сауда декларациясы деген жаңа түрдегі кеден декларациясы енгізіледі. Қазіргі таңда шетелдік интернет-платформалардан сатып алынатын тауарлардың құны 200 еуродан, салмағы 31 килограмнан аспаса, жеке пайдалануға арналған тауарлар санатына жатады. Осыған байланысты, аталған тауарлар ресми статистикаға енгізілмейді. Себебі сауда айналымына жатпайды.
Электрондық сауда тауарларының барлық көлемін декларациялау шетелдік интернет-платформалардан сатып алынатын тауарлар туралы толық статистиканы құруға мүмкіндік береді.
