Атырауда «Жеңіс» саябағындағы ескерткіш астында қалған қыз баланың өліміне қатысты сот процесі аяқталды. №2 сот ескерткішті тұрғызған демеуші «Творческий Союз» компаниясының басшысын кінәлі деп тапты. Батыс Қазақстандық кәсіпкер бір жыл алты айға бас бостандығынан айырылды.
НҰРТАС БӨЛЕКБАЕВ, АТЫРАУ ҚАЛАЛЫҚ №2 СОТЫНЫҢ СУДЬЯСЫ:
Сот үкім етті: Баймұқашев Дмитрий Юриевичті Қылмыстық Кодекстің 179-баптың 1 бөлімімен кінәлі деп тауып, 3 жылға бас бостандығынан айыру туралы жаза тағайындалсын. Осы мерзімде сәулет, қала құрылысы жұмысымен айналысуға тиым салынсын. ҚР Тәуелсіздігнің 30 жылдығына байланысты амнистияға орай жартысын қысқартып, 1 жыл 6 айға бас бостандығынан айыру жазасы тағайындалсын.
Одан бөлек, материалдық шығынмен бірге ата-анасына 20 млн теңге моралдық өтемақы төлеу міндеттелді. Естеріңізге салайық, қайғылы оқиға былтыр маусым айында болған еді. Нөсер жаңбырдан қорғанбақ болған отбасының үстіне ескерткіш құлап түседі. Салдарынан 7 жасар қыз бала қайтыс болды. Айта кетейік, ескерткішті 2020 жылы Ұлы жеңістің 75 жылдығы қарсаңында демеуші компания орнатқан. Судья сондай-ақ жеке қаулы шығарып,облыс прокурорына сол кездегі қала басшылары мен орынбасарларының іс әрекетінде қылмыстық құқық бұзушылық бар-жоғына назар аударуды ұсынды.
