Жазғы профилактикалық науқан аясында ТЖМ құтқарушылары балаларды сауықтыру лагерлерінде «Қауіпсіздік күндерін» өткізуде. Іс-шаралар өскелең ұрпақтың қауіпсіз жүріс-тұрыс мәдениетін қалыптастыруға және балаларға төтенше жағдайлар кезіндегі іс-қимылдарды үйретуге бағытталған, деп хабарлайды Astana TV.
Жетісу облысында ТЖД қызметкерлері «Жалын» лагерінде бағдарлама ұйымдастырып, эстафеталар, алғашқы медициналық көмек көрсету тәжірибесі, арнайы техника мен жабдықтарды таныстыру сынды интерактивті сабақтар өткізді. Іс-шараның шарықтау шегі — балалардың үлкен қуанышына айналған өрт сөндіру шлангысынан атқылаған «фонтан» болды. Барлық қатысушылар тек жағымды эмоциялар ғана емес, маңызды білім де алды.
Шығыс Қазақстан облысындағы «Алау» лагерінде құтқарушылар тақырыптық сайыстар, шеберлік сабақтары және өрт пен судағы жағдайлар кезінде әрекет ету жаттығуларын өткізді. Балалар құтқарушы кинолог пен оның төрт аяқты серігі — Хит есімді лабрадордың жұмысымен танысты. Сонымен қатар ТЖМ Апаттар медицинасы орталығының мамандарынан алғашқы көмек көрсетуді үйренді.
Жамбыл облысындағы «Болашақ» лагерінде Тараз қаласының №3 өрт сөндіру бөлімінің, жедел-құтқару жасағының және ТЖД қызметкерлері өрт, су және жер сілкінісі кезіндегі қауіпсіз жүріс-тұрыс қағидаларын үйрету іс-шарасын ұйымдастырды. Балалар көрсетілімдерге белсене қатысып, құтқарушылардың арнайы киімін киіп көріп, соңында дәстүрге айналған өрт сөндіру шлангысынан «жазғы душ» қабылдады.
Жамбыл облысы Жуалы ауданындағы «Тау самалы» және «Берікқара» лагерлерінде құтқарушылар өрт қауіпсіздігі ережелері мен су маңындағы қауіпсіз жүріс-тұрыстың маңыздылығына назар аударды. Балалар мен тәрбиешілерге түсіндірме әңгімелер, эвакуация бойынша практикалық сабақтар өткізілді және лагердегі төтенше жағдайлардың алдын алу бойынша нұсқаулықтар берілді.
Балалар лагерлерінде «Қауіпсіздік күндерін» өткізу — бұл тек профилактика ғана емес, білімді қызықты әрі жеңіл меңгеруге де мүмкіндік беретін тиімді тәсіл. Ойын түріндегі формат, белсенді қатысу мен достық атмосфера балалардың ережелерді есте сақтауына ғана емес, жеке қауіпсіздікке саналы түрде қарауына да септігін тигізеді.
Балаларды сауықтыру мекемелерінде жаз бойы профилактикалық іс-шаралар өткізілетін болады.
