Қазақстанда медициналық-санитариялық алғашқы көмек жүйесін ауқымды жаңғырту жалғасуда. Жаңғыртудың негізгі бағыттары мен аралық нәтижелері туралы Орталық коммуникациялар қызметінде өткен брифингте ҚР Денсаулық сақтау министрлігінің МСАК республикалық орталығының директоры Айгүл Қасымова хабарлады.
2025 жылдың басында тіркелген халық саны 20,3 млн-нан астам адамды құрайды. Елімізде барлығы 677 МСАК нысаны жұмыс істейді, оның 62%-ы қалаларда, ал 38%-ы ауылдарда орналасқан. Мемлекеттік ұйымдар шамамен 15 млн адамға қызмет көрсетеді, жекеменшік ұйымдар — шамамен 5 млн.учаскелік қызметтің негізін жалпы практика дәрігерлері (80%) құрайды, бұл ретте негізгі бейіндер бойынша жасақталу деңгейі дәрігерлер бойынша 84-87% және орта медициналық персонал бойынша 81%-ды құрайды.
Негізгі жетістіктердің бірі — нормативтік базаны жетілдіру. № 49 стандарттың жаңа редакциясында МСАК дәрігерін қабылдау ұзақтығы ұлғайтылды, бұл пациенттерді мұқият тексеріп қана қоймай, профилактика мен динамикалық бақылауды күшейтуге мүмкіндік береді.
Сондай-ақ, қызметкерлерге жүктемені азайту шаралары жүзеге асырылуда, дәрігерді үйге шақыру үшін көрсеткіштер қайта қаралды, мобилдік бригадалардың рөлі кеңейтілді және жедел жәрдем кабинеттері ашылды.
2025 жылдан бастап скринингтік бағдарламаларға тәсілдер жаңартылды. Тексеруге жататын санаттарды көрсете отырып, жас топтарын нақты бөлу енгізілді. Инновациялардың бірі 50 жастан асқан ер адамдар үшін цереброваскулярлық бұзылулар қаупін скрининг болды.
Диагностиканың ескірген әдістері қазіргі заманғы әдістермен ауыстырылады: глюкозаға арналған стандартты қан талдаудың орнына гликатталған гемоглобин HbA1c анықтамасы қолданылады.
2025 жылдың екінші жартыжылдығында онкоскринингтердің ТМККК жүйесіне кезең-кезеңімен көшуі басталады, бұл барлық нысаналы топтар үшін тең қолжетімділікті қамтамасыз етеді.
