Қостанай қаласында TANK 300 автокөлігін мас күйде басқарған 57 жастағы азамат жол апатына себеп болды.
Жүргізуші бағдаршамның тыйым салынған белгісіне тоқтамай, алдымен қоршауға, кейін ВАЗ-2115 автокөлігіне соқтығысқан. Жол-көлік оқиғасынан материалдық шығын келтіріліп, жүргізуші оқиға орнынан қашып кетуге тырысқан.
Тексеру барысында оның орташа дәрежеде мас болғаны анықталды.
Жүргізушіге қатысты ӘҚБтК-нің бірнеше бабы бойынша әкімшілік хаттама толтырылып, көлік айып тұрағына қойылды. Жүргізуші айықтырғышқа жеткізіліп, іс сотқа жолданды.
