2025 жылғы 4-5 қыркүйекте Астанада VIII Astana Finance Days (AFD) форумы өтеді. Жылдың басты қаржы оқиғаларының бірін Astana International Forum қолдайды.
Биылғы форумның тақырыбы – «Болашақтың негізін қалайтын капитал». Ол ағылшын тіліндегі capital сөзінің екі мағынасын қамтиды: Астана – ел астанасы әрі Шығыс пен Батысты байланыстыратын қаржы орталығы, сондай-ақ орнықты өсудің негізгі қозғаушы күші саналатын капитал.
Әлемде қаржы ресурстары үшін бәсеке артып отырған шақта капиталды тиімді пайдалану – климаттың өзгеруі, экономикалық өсім және жаңа технологияларды дамыту сынды сын-қатерлерді еңсерудің басты жолы ретінде қарастырылуда.
Форумға әлемнің 70-тен астам елінен 5 мыңнан астам қатысушы келеді деп күтілуде. Олардың қатарында банкирлер, брокерлер, инвесторлар, ірі компания жетекшілері мен инновация саласының мамандары бар.
Astana Finance Days үш негізгі бағытқа басымдық береді:
қаржылық капитал – жаңа қаржылық өнімдер, портфельдік инвестициялар мен криптовалюталар;
инфрақұрылымдық капитал – өңірлік және жаһандық жобаларды дамыту;
институционалдық капитал – тұрақты даму мен жаңа реттеу трендтері.
Басты спикерлердің арасында әлемге танымал футуролог әрі «Банк 4.0» және «Техносоциализм» кітаптарының авторы Бретт Кинг бар. Сондай-ақ қазақстандық және халықаралық ірі қаржы ұйымдарының басшылары – Ораз Жандосов, Тимур Турлов, Ғалым Хусаинов, Жад Эллаун, Рияд Юсуф, Хани Каблави, Мешаль Джабер Әл-Фарас және басқа да сарапшылар сөз сөйлейді.
Биылғы форумның ерекшелігі – AFD Exhibition Hub көрме алаңы. Мұнда капитал мен цифрлық инновациялар нарығындағы компаниялар өз шешімдерін таныстырып, стратегиялық серіктестермен тікелей байланыс орнатады.
Форумды «Астана» халықаралық қаржы орталығы ұйымдастырады. GFCI рейтингі бойынша ол – Шығыс Еуропа мен Орталық Азиядағы №1 қаржы орталығы. Іс-шара Freedom Broker, KAZ Minerals және басқа серіктестердің қолдауымен өтеді.
