Ресей 4 сағатта Киевті басып алатын еді. Бір генералдың кесірінен жеңіліске ұшырады. Дональд Трамп осылай деді. АҚШ Президентінің айтуынша, осы жайт қана Украинаны құтқарған. Ақ үй басшысы дүниені дүрліктіруден шаршар емес. Үндістанға қарсы 50 пайыздық тарифтер күшіне еніп, саудагерлерді шығынға батырып үлгерді. Шартараптағы соңғы жаңалықтарды Еркелді Тілеуқұл шолып шықты.
Украина соғыстың бірінші күні-ақ, астанасынан айырылатын еді. Бар болғаны 4 сағатта шаруа тынатын еді. АҚШ Президенті Дональд Трамп осылай деп тағы мысқылдады. Бұл мазағы Путинге де, Зеленскийге де қатысты секілді.
ДОНАЛЬД ТРАМП, АҚШ ПРЕЗИДЕНТІ:
Ресей әскері тас жолмен 4 сағат жүрсе болды, Киевте болатын еді. Бірақ, бір данышпан генерал ауылшаруашылыққа арналған жерлермен жүруге бұйрық беріпті. Дәл сол мезетте нөсер жауын даланы батпаққа айналдырған. Ол генералдың кім екенін білмеймін. Бірақ, Путинді білемін. Ол генерал қазір бұйрық бере қоймас.
Үндістан Трамптың соқпағына ұшырады. Ресейден мұнай сатып алуды тоқтатпағаны үшін АҚШ 50 пайыздық тариф енгізді. Санаулы күндердің ішінде үнді экономикасы үлкен шығынға ұшырады. Шетелге тауар сататын қарапайым саудагерлер болса, не істерін білмей жүр.
ШАМИМ АЗАД, САУДАГЕР:
Мен АҚШ-қа тауар сататынмын. Бірақ, ол жақтағы тұтынушыларым кенет бас тартып отыр. Себебі, олар үшін баға 2 есе көтерілді. Біздің билік, бас кезінде АҚШ талабын орындауы керек еді. Енді бүкіл экономика құрдымға кетеді.
Пәкістанда нөсер жауынның артынан ұласқан су тасқыны 250 мың адамды дүрліктірді. Оларды билік қауіпсіз жерлерге көшірді. Жаз басынан бері Пәкістанда табиғи апаттан 800 астам адам қаза тапқан.
