Бүгін – Ядролық сынақтарға қарсы халықаралық іс-қимыл күні. Бұл атаулы датаны осыдан 16 жыл бұрын 2 желтоқсанда Біріккен Ұлттар Ұйымының Бас Ассамблеясы Қазақстанның бастамасымен бекіткен. Содан бері еліміз әлем тыныштығын нығайтуға, халықаралық әріптестікті дамытуға күш салып келеді.
Қазақстан – жаппай қырып-жою қаруынан ерікті түрде бас тартқан әлемдегі алғашқы мемлекет. Еліміздің бейбіт өмірді насихаттауын бүкіл әлем мойындап, үлгі алады. Өйткені, ел полигонның зардабын әбден тартқан еді. Мемлекет басшысы әлеуметтік желіде жариялаған жазбасында жаһанды ядролық қарудан бас тартуына күш салуымыз керегін айтты.
ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Халқымыз атом қаруын сынаудан қатты зардап шекті. Мұндай қасірет қайталанбауға тиіс. Біз кейінгі ұрпақтың жарқын болашағы үшін бейбітшілікті нығайтып, халықаралық әріптестікті дамыта түсуіміз керек. Ядролық қарудан және сынақтардан біржола бас тартуға күш салуымыз қажет. Бейбітшілік пен қауіпсіздік – бүкіл адамзатқа ортақ ең басты құндылықтар.
Еліміз тәуелсіздік алған жылдың дәл осы күні "Семей" ядролық полигоны жабылды. Бірақ онда өткізілген сынақтың салдары талайдың тағдырына дақ қалдырды. Еліміз осы уақытқа дейін өңірді радиактивті қалдықтардан тазалау бойынша жүйелі жұмыстар мен зерттеулер жүргізуде. Соның арқасында 8900 шаршы шақырым аумақ радиациядан таза екені анықталды.
ҒАНИ МӘДИ, ҚР АТОМ ЭНЕРГЕТИКАСЫ ЖӨНІНДЕГІ АГЕНТТІГІНІҢ ДЕПАРТАМЕНТ ДИРЕКТОРЫ:
Полигон аумағында кешенді зерттеу жұмыстары жүргізілді. Біз полигонның таза және лас жерлерін анықтадық. Кезінде жарылмай қалған 13 шұңғыма, 181 штольмалар өз мақсатына сай қолдануға жол бермейтіндей деңгейге келтірілді.
"Бейбіт саясатты ұстанатын елдердің қолында ядролық қарудан да күшті жарақ бар. Ол - бейбітшілік". Саясаттанушы Жанат Момынқұлов осылай дейді. Қазақстан бұл бағытта салмақты әрі жүйелі сыртқы саясатты жүргізуде. Соның арқасында әлемде тұрақтылық күнтәртібін ілгерілетіп келеді.
ЖАНАТ МОМЫНҚҰЛОВ, САЯСАТТАНУШЫ:
Ядролық қарудан зардап шеккен және ядролық қаруға қарсы үлкен бір қозғалысты бастаған мемлекет ретінде осы мәселеге үлкен көңіл бөлеміз. Өйткені қазіргі геосаяси жағдайда ядролық қару өзектіленіп кетті. Осы тұрғыдан Қазақстанның қай-қай жаққа болмасын осындай сигнал жіберуі, яғни біз бейбіт елміз, біз халықаралық ұйымдарда бейбітшілікті ілгеілетуші ел екенімізді айғақтап, осындай саясат жүргізіп жатырмыз.
Қорыта айтқанда, ядролық қаруға қарсы күрес – бүкіл адамзатқа ортақ миссия. Қазақстан бұл жолда жауапкершілікпен әрі табандылықпен әрекет етіп келеді.
