"Украинаға көндігуге тура келеді". Жерінен айырылып қалса да, соған мойынсұнып, әйтеуір бұл соғысты аяқтау қажет. АҚШ Президенті Дональд Трамп осылай деді. Ресей мен Украина арасындағы жауластықты тоқтату мүмкін деген сөзге Трамп түгіл, Еуропа елдерінің басшылары да сенуді қойған. Қайта Дания, Нидерланд және Норвегия Киевті қаруландыруға бекініп отыр. Өкінішке қарай, Газадағы жағдай да көңіл көншітпейді. Осы және өзге де жаңалықтар Жер-Жаһан айдарында.
7 ай, 222 күн. Дональд Трамптың Ресей мен Украинаны татуластырамын деп, шырылап жүргеніне осынша уақыт болды. Бастапқыдағыдай құлшыныс қазір байқалмайды. Ақ Үй басшысының сабыры сарқылып, сеніміне селкеу түскендей. Бауырлас екі елдің жақын арада бітімге келе қоймайтынын ақыры өзі де мойындады. Тамыз айындағы бірқатар кездесулер де нәтижесін бермеді. Трамп, тіпті, Украинаны қырсығып отыр деп айыптап, даудың басы болып отырған территориясынан айырылуға мойынсұнуы тиіс деген пікір білдірді. Қандай жолмен болса да – маңызды емес, әйтеуір соғыс аяқталуы тиіс деп отыр. Ресей де шегінер емес. Жығылғанға жұдырық болғандай, украин қалаларына тағы бір мәрте әуе соққысын жасады.
КЭРОЛАЙН ЛИВИТТ, АҚ ҮЙ БАСПАСӨЗ ХАТШЫСЫ:
Дәл қазір Владимир Путин мен Владимир Зеленский өз еріктерімен соғысты тоқтатуға мүдделі емес. Вашингтон мұны түсініп отыр. Трамп бұл жайында көп ұзамай бірқатар мәлімдемелер жасайды. Сондай-ақ Ақ Үй басшысы 23 қыркүйек күні БҰҰ Бас Ассамблеясына қатысатынын да айта кету керек.
Бүгіннен бастап Газада қақтығыс кезіндегі күнделікті гуманитарлық үзілістер тоқтайды. Бұл туралы Израиль қорғаныс әскері мәлімдеді. Енді бейбіт тұрғындарға көмек жеткізу, тіпті, қиындай түспек. Қазірдің өзінде Газа секторындағы жағдай тым ауыр. Көптеген отбасы заттарын жинап, бас сауғалауда. Аштық жайлап барады. Мұны Түркияның сыртқы істер министрі Хакан Фидан Ислам мемлекеттері үшін ортақ мәселе деп атады.
ХАКАН ФИДАН, ТҮРКИЯНЫҢ СЫРТҚЫ ІСТЕР МИНИСТРІ:
Палестина Ислам әлемінің геостратегиялық проблемасына айналуда. Израиль экспансионизмі аймаққа үлкен қауіп төндіретіні белгілі.
АҚШ Израильді ашық қолдай алмайды. Сондықтан мәселені шешу үшін араб мемлекеттерінің өкілдері Вашингтонға қатысты өз ықпалын пайдалануы керек.
