Алматыда IT және креативті индустрияның болашағына арналған кеңейтілген отырыс өтті. MOST IT HUB алаңында өткен жиында цифрландыру, өнеркәсіптік шешімдер, венчурлық қаржыландыру және қаржы секторының жаңа бастамалары талқыланды. Бас тақырыптардың бірі – ұлттық «Aitu» суперқосымшасының таныстырылымы болды.
«Aitu» – Қазақстанның цифрлық экожүйесіндегі жаңа қадам. Ол азаматтарға, бизнеске және мемлекеттік құрылымдарға арналған әмбебап платформа ретінде дамып келеді. Жаңа сервис тек мессенджер ғана емес, компанияларға арналған шешімдерді де қамтиды. Чат-боттар, қоңырау орталықтарымен ықпалдасу және шағын қосымшалар іске қосу мүмкіндігі бар.
ЖАРҚЫНБЕК АЗАМАТОВ, BTS DIGITAL БАС ДИРЕКТОРЫНЫҢ МІНДЕТІН АТҚАРУШЫ:
Оның ішінде көптеген сервистер болады. Оның ішінде біздің ұлттық мессенджеріміз болады. Ватсап, телеграм секілді и одан басқа тағы да AI асисстенттер болады. Күнделікті дамуға және жұмыс бабында қолдануға. оның бәрін бір жерде біз жинаймыз. Азаматқа басқа приложениелардың көбісін телефонға орнатудың қажеттілігі болмайды.
Кеңес жұмысына қаржы секторының жетекшілерімен қатар, венчурлық инвестиция саласының сарапшылары мен креативті индустрия өкілдері қатысты. Спикерлердің айтуынша, IT саласының дамуы тек технологиялық қана емес, экономикалық серпін беретін күшке айналуда.
ДАУРЕН САРТАЕВ, «ХАЛЫҚ БАНК» АҚ БАСҚАРМА ТӨРАҒАСЫНЫҢ БІРІНШІ ОРЫНБАСАРЫ:
«Aitu»-дың дамуын ұзақ уақыттан бері назарда ұстап келеміз. Команда үнемі жаңа қызметтер мен мүмкіндіктер қосып, қосымшаны жетілдіріп отырады. Бүгінгі таныстырылымда да көптеген тың жаңалықтар ұсынылды. Ендігі міндет – осы мүмкіндіктерді тиімді пайдаланып, «Aitu»-ды қалыптасқан нарықта бәсекеге қабілетті ұлттық өнімге айналдыру.
Қатысушылардың пікірінше, отандық өнімдерге қолдау көрсету – цифрлық тұтынушылық патриотизмді қалыптастырудың басты шарты. Осылайша, Aitu сынды ұлттық қосымшалар ел ішінде дамып қана қоймай, әлемдік нарықта да бәсекеге қабілетті болуға мүмкіндік алады.
