Мәжіліс төрағасы Ерлан Қошанов барша қазақстандықтарды Конституция күнімен құттықтады, хабарлайды Astana TV.
Ол өзінің құттықтауында Ата заңның елдіктің тұғыры мен мемлекеттіліктің өзегін айқындайтын тарихи маңызына тоқталды.
Құрметті отандастар! Сіздерді Конституция күнімен шын жүректен құттықтаймын! Бұл – елдіктің тұғырын, мемлекеттіліктің өзегін айқындаған Ата заңның мәнін сараптап, құндылықтарын дәріптейтін бірегей мереке. Биыл осынау басты құжаттың қабылданғанына 30 жыл толып отыр. Онда халқымыздың сан ғасырлық елдік дәстүрі мен арман-аңсары, заманауи әлемдік озық құқықтық нормалар нақты көрініс тапқан. Осы жылдар ішінде Конституция Қазақстанның саяси және құқықтық жүйесінің негізін қалап, институционалдық құрылымын орнықтырып, халқымыз бен берекелі қоғамның нық ұстанар негізгі қағидаттары мен қастерлі құндылықтарын белгіледі. Соның арқасында еліміз іргелі мемлекетке айналып, жаһанда өзіндік елеулі орны бар орта державалардың қатарынан берік орын алды. Мемлекет басшысы Қасым-Жомарт Тоқаевтың жүргізген ауқымды реформаларының нәтижесінде қайта жаңғырған Конституция, оған енгізілген түбірлі түзетулер заман сұранысы мен халқымыздың талап-тілегін кеңінен қамтып, байтақ Отанымыздың дамуына тың серпін берді. Заң үстемдік еткен жерде әділеттің салтанат құратыны анық. Ендеше, Конституциямыз заң мен тәртіптің қанат жаюына барынша ықпал етіп, ұлтымызды ұлы мұраттарға бастай берсін. Әрбір шаңыраққа шаттық пен бақ-береке тілеймін. Еліміз аман, жұртымыз тыныш болсын!
