Әлеуметтік желілерде танымал полиглот-блогер Юдзи Белеза Венада атыраулық әйел мен оның ұлымен кездесіп, сұхбаттасқан. Бейнежазба көп ұзамай желіде кең таралды.
Әңгіме барысында блогер өзін қазақпын деп таныстырды. Әйел күлімсіреп:
- Жоқ, сен қазақ емессің. Міне, менің ұлым, бірақ ол қазақша емес, орысша және голландша сөйлейді, – деп жауап берді.
Содан кейін әңгіме голланд тілінде жалғасты. Белеза балаға ескерту жасады:
-Саған қазақ тілін үйрену керек.
Анасы блогерді қолдап, қазақ тілін білудің маңызды екенін атап өтті.
Сұхбат барысында Юдзи Белеза ұлттық тағамдар туралы да сұрады:
«Бешбармақ бар ма? Қазақ шоколады бар ма?» – деп әзілдеді ол.
Бұл – шетелде жүрген қандастардың ұлттық асқа деген сағынышын білдіргені еді.
Кейін белгілі болғандай, атыраулық әйелдің ұлы Парижде өткен Олимпиадаға қатысқан.
Бейнежазба 102 мыңнан астам лайк пен 2000-ға жуық пікір жинады. Соның ішінде кейіпкердің ұлы да пікір қалдырды:
«Кездескеніме қуаныштымын! Қазақша сөйлеуді жаттықтырамын».
