Бүгін ҚР Ғылым және жоғары білім вице-министрі Гүлзат Көбенова С.Аманжолов атындағы Шығыс Қазақстан университетінің негізгі цифрлық, білім беру және ғылыми-инновациялық жобаларымен танысты.
Мемлекет басшысы Қасым-Жомарт Тоқаев жасанды интеллект технологияларын дамыту мен білікті кадрлар даярлау елдің бәсекеге қабілеттілігі мен тұрақты болашағын айқындайтын стратегиялық басымдық екенін атап өткен болатын. С.Аманжолов атындағы ШҚУ бұл мемлекеттік бағдарларды нақты жобалар мен заманауи инфрақұрылым арқылы сәтті іске асырып келеді.
Цифрлық дәуірдегі адами капиталды дамыту жасанды интеллектіні білім беру процесіне енгізудің айқын мысалы – «AI Center Amanzholov University» орталығының қызметі. Вице-министрге ұлттық «AI-Sana» жобасының жүзеге асуы, студенттердің әзірлемелері және инновациялық сервистер таныстырылды. Олардың қатарында AI-Ustaz оқытушыларға оқу материалы мен контент дайындауға көмектесетін интеллектуалды агент, сондай-ақ «АнтиБуллинг» деген студенттерге анонимді қолдау көрсететін әлеуметтік Telegram-бот бар. Python-кодтың сапасын гибридті бағалау жүйесі сияқты техникалық шешімдер университеттің цифрлық құзыреттерді дамытуда белсенді жұмыс істеп жатқанын және инженерлік ойлау мәдениетін қалыптастырып отырғанын көрсетті.
Сондай-ақ «Dana Bala» үздіксіз және инклюзивті білім беру орталығы таныстырылып, ерекше білім беру қажеттіліктері бар балаларды қолдауға бағытталған отандық әзірлемелер ұсынылды. Мәселен, С.Аманжолов атындағы Жоғары колледждің 3 курс студенттері ұсынған жасанды интеллект интеграцияланған оқу сайтының заманауи интерфейсі бар, бұл сайтта интерактивті ойындар жинағы, пайдалы нұсқаулықтар, орталық туралы ақпарат, жылдам байланыс мүмкіндіктері және Telegram-ботпен интеграция – инклюзивті оқыту бойынша материалдар мен ұсыныстарды жылдам алуға мүмкіндік беретін функционал қарастырылған.
– Инклюзивті білім беру – бұл тек уақыт талабы емес, қоғамның өркениеттілігін айқындайтын көрсеткіш. Бүгінгі жастар осындай сапалы, тиімді цифрлық шешімдер әзірлеп, оны нақты нәтижеге айналдырып жатыр. Олар өз еңбегі арқылы балалардың ғана емес, олардың отбасыларының да өмір сүру сапасын жақсартуға елеулі үлес қоса алады, – деді Гүлзат Көбенова.
«Dana Bala» орталығы педагогика, цифрлық технология және ғылыми зерттеулерді тиімді үйлестіре отырып, бейімделген жиһаз, коррекциялық жабдықтар, цифрлық сервистер және авторлық әдістемелерді ұсынады. Студенттердің «Dana Bala сандықшасы» және «Dana Bala үшқырлы әлемі» стартаптары инклюзивті білім беру сапасын жақсартуға бағытталған практикалық шешімдер ретінде ерекше қызығушылық тудырды.
Университеттің инновациялық әлеуетін таныстыру «Shygys Bastau» технопаркінде жалғасты. Мұнда вице-министр студенттер мен ғалымдардың инженерлік, зертханалық және цифрлық бастамаларымен танысты. Цифрлық технологиялар және модельдеу зертханасында үлкен деректер, спутниктік суреттер және жасанды интеллект әдістері негізінде тасқын қаупін және топырақ ылғалдылығын болжау бойынша зерттеулер ерекше орын алады. Бұл жобалар аграрлық сала, тәуекелдерді басқару және өңірдің экологиялық тұрақтылығы үшін маңызды шешімдер ұсынатынын көрсетті.
Сондай-ақ вице-министр Ұлттық ғылыми зертхананы және «Беттер инженериясы мен трибологиясы» ғылыми-зерттеу орталығын аралады. Заманауи жабдықтар мен материалтану, машина жасау және химия салаларындағы өзекті зерттеулер университеттің жоғары ғылыми инфрақұрылымын және өнеркәсіпке бағытталған қолданбалы міндеттерді орындауға дайын екенін айғақтайды.
– Біз еліміздің ғылыми әлеуетін одан әрі арттырып, жаңа білім мен технологияларды дамытуға бағытталған жұмыстарды жүйелі түрде жалғастыра береміз. Студенттер мен жас зерттеушілер үшін тың мүмкіндіктер ашу – университеттің басты міндеттерінің бірі. Қазақстанның болашағына өз үлесімізді қосу, ғылым мен білімнің дамуына серпін беру – біздің ортақ миссиямыз, – деді ШҚУ ректоры Мұхтар Төлеген.
Сонымен қатар вице-министр университет жобаларының елдегі цифрлық трансформация жағдайында кадрлық әлеует қалыптастыру жөніндегі стратегиялық міндеттерге толық сай келетінін атап өтті. Инклюзивті платформалардан бастап интеллектуал қызметтерге, инженерлік және экологиялық шешімдерге дейін ұсынылған бастамалар университеттің мықты инновациялық экожүйесін қалыптастырып отырғанын дәлелдейді.
