Марғұлан университеті базасында Қазақстанда алғаш рет жастардың девиантты мінез-құлқын зерттеуге арналған мамандандырылған ғылыми зертхана іске қосылды. Жаңа құрылым жастар арасындағы девиантты мінез-құлықтың себептері мен механизмдерін кешенді зерделеуге бағытталған бірегей ғылыми алаңға айналды. Зертхана аясында тұлғаның әртүрлі жас кезеңдеріндегі девиантты мінез-құлықтың қалыптасу факторлары, түрлері, факторлары мен қалыптасу тетіктері ғылыми негізде зерттеледі.
Аталған орталықтың меңгерушісі, психология ғылымдарының кандидаты Ольга Колюхтің айтуынша, зертхананың негізгі мақсаты – тек мәселені талдау ғана емес, сонымен қатар оның алдын алу тетіктерін айқындау.
«Біздің міндетіміз – тәуекел факторларын ерте кезеңде анықтап, ғылыми негізделген профилактикалық және білім беру бағдарламаларын әзірлеу. Зерттеу нәтижелері білім беру ұйымдары мен мүдделі мемлекеттік құрылымдардың практикалық қызметінде қолданылатын болады», – деп атап өтті ол.
Зертхана алғашқы күндерден бастап нақты нәтижелер көрсетіп келеді. Қазіргі уақытта жобалар бірнеше бағыт бойынша қатар жүзеге асырылады. Атап айтқанда, харассмент, буллинг және лудоманияның алдын алуға арналған кинотренингтер ұйымдастырылып, оларға 150 адам қатысты.
Алдағы кезеңде Ұлттық қауіпсіздік комитеті департаментінің, Шекара қызметінің, прокуратура органдары мен әскери бөлімдердің өкілдерінің қатысуымен «Қиын әңгімелер» атты ашық дәрістер циклі бастау алады. Бұл бастама жастармен тікелей диалог орнатып, құқықтық сауаттылықты арттыруға және әлеуметтік жауапкершілікті нығайтуға бағытталған.
Сонымен қатар зертхана мамандары студенттер арасында суицидтік тәуекелдер мен агрессивті мінез-құлық белгілерін анықтауға арналған ауқымды психологиялық диагностика жүргізді. Зерттеуге 1473 адам қамтылды. Бұдан бөлек, Павлодар облысындағы жасөспірімдер мен студенттердің психологиялық әл-ауқаты, стресс пен мазасыздық деңгейі зерделеніп, оған 428 респондент қатысты.
Жаңа зертхананың қызметі жастардың девиантты мінез-құлқының алдын алуға бағытталған жүйелі тәсілді қалыптастыруға мүмкіндік береді. Сонымен қатар бастама Павлодар өңірінің ғылыми әлеуетін арттыруға, ғылым, мемлекеттік құрылымдар және білім беру ұйымдары арасындағы тиімді өзара іс-қимылды нығайтуға елеулі үлес қосады.
