Таразда «Сәтті қадам» партиялық жобасы аясында бос жұмыс орындар жәрмеңкесі өтті. Мақсат - оқу орнын бітіріп, жұмыссыз жүрген жастарға «екі қолға бір күрек» табуына көмектесу. Жоба үш бағыттан тұрады. Бірінші бағыты - оқу орнын тәмамдаған түлектерді Астана мен Алматыдағы ұлттық компанияларда жұмыс істеу үшін бақтарын сынату. Екіншісі жетім балаларды жұмыспен қамту. Соңғысы Ұлттық біріңғай тестілеуден сүрінген бітірушілерге оқуға түсуге көмек көрсету. Бүгінгі жәрмеңкеге үш түлек жұмыс іздеп келді. Олар техникалық мамандықтарды тәмамдаған жетім балалар. Жастарға жобаның екінші бағыты бойынша көмек көрсетілмек. Жамбылда 2015-2016 жылы оқу бітірген түлектер арасында 146 баланың ата-анасы жоқ. Бүгінде олардың 71-і тұрақты жұмыс істеп жатыр.
Бақкелді Тұрсынбек, «Нұр Отан» партиясы Тараз қалалық филиалы жанындағы «Жас Отан» ЖҚ басшысы:
Бұл жәрмеңке аптасына 7 күн болатын болса, соның бір күнінде өткізіліп тұрады. Яғни алдағы уақытта аптасына бір рет өткізіліп тұратын болады. Енді мақсат - партия тарапынан ұйытқы болу, ықпал жасау, осы жастарды, ата-анасы қамқорлығынан айырылған жастарды жұмысқа орналастыру.
Былтыр партияның Жамбылдағы филиалы жастарды жұмыспен қамту үшін 54 мекемемен меморандумға отырған. Нәтижесінде 28 жас тұрақты жұмыс тапқан. Биыл жұмыс істеуге жарап қалған 168 жетім бала бар. Партиялықтар оларға да жұмыс тауып беруді көздейді. Сондықтан, қазірден бастап партия өкілдері 70-ке жуық жұмысберуші мекемемен екі жақты келісімдер жасасып жатыр.
Руслан Балтықов, Тараз қаласының тұрғыны:
Мен
осы биыл бітірген жас маманмын. Осы «Нұр Отанға» жұмыссыздарды жұмыспен
қамтамасыз ету орнына шақырды. Мені «Гудмейкер» компаниясы өзіне шақырды. Мен
сол компанияға өзімнің түйіндемемді қалдырып кеттім. Мені сол жұмысқа алады
деген ойдамын. Мен Жамбыл политехникалық колледжінде «Бақылау, өлшегіш аспаптар
және автоматика» мамандығын бітірдім.
