Қазақстандық саяхатшылар үшін Оңтүстік-Шығыс Азияға жаңа бағыт ашылмақ. SCAT Airlines Шымкенттен Сингапурға тікелей емес, Санья арқылы ұшатын жаңа рейсті іске қосады.
Алғашқы рейс 20 қазанға жоспарланған.
Ұшулар заманауи Boeing 737 MAX 8 ұшақтарымен орындалады. Шымкенттен Саньяға дейінгі жол шамамен 6,5 сағатқа созылады. Қытайдың Санья қаласында жолаушылар шамамен екі сағат транзитте болып, әуежайдың стерильді аймағынан шықпай Сингапурға қарай сапарын жалғастырады.
Санья–Сингапур бағыты бойынша ұшу уақыты шамамен үш сағатты құрайды.
Маршруттың екі кезеңінде де жолаушыларға тамақ беріледі: Шымкенттен ұшқаннан кейін ыстық тамақ, ал Саньядан Сингапурға дейін жеңіл ланч ұсынылады.
Жаңа бағыт Сингапурға барумен қатар, Оңтүстік-Шығыс Азия бойынша саяхатты жалғастыруға мүмкіндік береді. Сингапур аймақтағы маңызды авиациялық орталықтардың бірі болғандықтан, одан әрі басқа елдерге ұшуға ыңғайлы бағыт ретінде қарастырылады.
Шымкент–Сингапур рейсіне билеттерді қазірден бастап SCAT Airlines-тың ресми сайтынан және онлайн билет сату сервистері арқылы сатып алуға болады. Дайын туристік пакеттер де ұсынылады.
Жаңа әуе бағыты SCAT Airlines, Қазақстан мен Қытайдың тиісті мемлекеттік және авиациялық құрылымдарының, сондай-ақ Сингапур авиациялық билігінің бірлескен жұмысы нәтижесінде іске қосылмақ.
