Шығыс Қазақстан облысының Күршім ауылында «Әділет» партиясының қоғамдық қабылдауы өтті. Кездесу барысында тұрғындар абаттандыру, коммуналдық инфрақұрылым және әлеуметтік салаға қатысты мәселелерін көтерді, деп хабарлайды AstanaTV.
Ауыл тұрғыны Жаңыл Тырнақпаева көпқабатты үйлердің аулаларындағы қоқыс контейнерлерінің жағдайына қатысты өтініш білдірді. Оның айтуынша, ескі контейнерлер әбден тозып, тұрғындарға қолайсыздық туғызған. Бұл мәселе бұған дейін де көтерілгенімен, ұзақ уақыт бойы шешімін таппаған.
Партия өкілдері тұрғынның өтінішін бақылауға алды. Көтерілген мәселе шешіліп, Күршім ауылындағы көпқабатты үйлердің аулаларында тұрған ескі қоқыс контейнерлері жаңасына ауыстырылды.
«Бұл мәселе біз үшін өте маңызды еді. Ескі контейнерлер тұрғындарға қолайсыздық туғызып келген болатын. Қоғамдық қабылдауда көтерген өтінішіміздің назарға алынып, қысқа уақытта шешімін тапқанына қуаныштымыз. Тұрғындардың мәселесіне бейжай қарамай, нақты көмек көрсеткен партия өкілдеріне алғысымды білдіремін», - деді ауыл тұрғыны Жаңыл Тырнақпаева.
Жаңа контейнерлердің орнатылуы аулалардың тазалығын сақтауға және тұрғындарға қолайлы жағдай жасауға мүмкіндік береді.
Айта кетейік, «Әділет» партиясының қоғамдық қабылдаулары өңірлерде жалғасады. Мұнда тұрғындар өздерін толғандырған мәселелерін тікелей айтып, оларды шешуге қатысты тиісті қолдау ала алады.
