1990 жылы 25 қазанда Қазақстанның Мемлекеттік егемендігі туралы Декларация қабылданды.
Бұл тарихи құжат еліміздің Тәуелсіздікке бастайтын алғашқы әрі батыл қадамы болды. Республика күні — егемендігімізді ұлықтайтын, елдік пен бірлігімізді нығайтатын ұлық мереке.
Республика күні – халқымыздың азаттық пен тәуелсіздік жолындағы күресінің символы. Бұл мереке арқылы біз өз мемлекеттілігіміздің қалыптасу кезеңдерін еске алып, елдің даму жолында еңбек еткен тұлғаларға құрмет көрсетеміз. Сонымен қатар, бұл күн жас ұрпаққа елдің тарихын танытып, отансүйгіштік сезімін арттыруға бағытталған.
Бүгінде Республика күні мемлекеттік деңгейде атап өтіледі. Елдің түкпір-түкпірінде мерекелік шерулер, концерттер мен патриоттық акциялар ұйымдастырылады. Әнұран шырқалып, көк Ту көтеріліп, халқымыздың бірлігі мен тәуелсіздікке деген құрметі айшықталады.
Ата-бабамыз аңсаған азаттықтың қадірін біліп, еліміздің өркендеуіне үлес қосу — әрбір азаматтың қасиетті борышы. Мемлекетіміздің іргесі берік, аспанымыз ашық, бейбітшілігіміз баянды болсын!
