«Астана»
футбол командасы айды аспанға шығарды. УЕФА Чемпиондар лигасында сынға түскен
отандастарымыз клуб тарихында тұңғыш рет топтық кезеңге жолдама алды. Бұл
жеңісімен футболшыларымызды Елбасы Нұрсұлтан Назарбаев құттықтады. Іріктеу
жарысының үшінші кезеңінде сырт алаңда Кипрдің «АПОЭЛ» командасымен сынға
түскен астаналық клуб екі кездесу қорытындысы бойынша 2-1 есебімен жеңіске жетті. Самат Қанағатов толықтырады.
«Астана» футбол командасының есімі Қазақстан футбол тарихында алтын әріппен
жазылары сөзсіз. Өткен жылы ел біріншілігінде жеңіске жетіп, чемпиондар
лигасына жолдама алған Станимир Стойловтың шәкірттері жанкүйерлер қошеметіне
бөленді. Дәрежелі жарыстың алғашқы кезеңдерінде Словенияның «Марибор» және
Финляндияның «ХИК» командаларын айналып өткен астаналық клуб плей-офф ойынында
Кипрдің «АПОЭЛ» командасымен бақ сынады.
«Астана Арена» стадионында өткен
кездесуде 1-0 есебімен басым түскен қазақстандық ұжым қарымта ойында 1-1
есебімен тең түсті. Екі кездесу қортындысы 2-1. Клуб тарихында тұңғыш рет топтық
кезеңге жолдама алған «Астана» енді «Барселона», «МанчестерЮнайтед», «Реал», «Бавария» сынды Қарт Құрлықтың азулы командаларымен
ойын өткізуге мүмкіндік алды.
Құралбек
Ордабаев, қазақ футболының ардагері:
Өте
жақсы ойын көрсетті. Халықтың барлығы риза. Сол себепті мен өз атымнан, футбол
ардагерлері атынан «Астана» футбол клубына, команда жанкүйерлеріне, қазақстандық жанкүйерлерге сәттілік тілеймін. Келешекте «Астана» футбол клубы лига
чемпионында ойнап, үлкен нәтижеге жетсе, барлығымыз қуанамыз.
«Астана»командасының
топтық кезеңдегі қарсыластары бүгін Швейцарияның Ньеон қаласында жеребе тастау
рәсімінде анықталады. Айта кетейік, топтық кезеңге шыққаны үшін «Астана» УЕФА тарапынан 14 млн еуро алатын болды. Мұнан өзге топтық
кезеңдегі әр-бір жеңіске 1,5 млн еуро төленбек. Тең түскен жағдайда клуб бюджеті
500 мың еуромен толығады. «Астана» командасының жетістігі Қазақстанды УЕФА
рейтингінде 30-шы орынға көтерді. Үлесімізде қазір 12 мың 875 ұпай бар. Бұл
дегеніңіз, келесі жылдан бастап төрт бірдей қазақстандық ұжым еурокубок
жарыстарына қатыса алады деген сөз. Қазақ футболының ардагері бүгін өтетін «Қайрат» және «Бордо» командаларының
кездесуіне байланысты ойын ортаға салды.
Құралбек
Ордабаев, қазақ футболының ардагері:
«Қайрат» футбол клубы кешегі «Астана» футбол клубының жеңісіне ортақ бола отырып, тағы да жанкүйерлерді
қуантса, жақсы болатын еді. Сол себепті мен кешегі «Астананың» жолын «Қайрат» та қуса, деген ниетпен, Қайратқа үлкен жеңіс тілеймін. Жақсы ойын көрсетсе, мен ойлаймын, «Қайрат» футбол клубы «Астана» сияқты үлкен нәтижеге жетеді деп.
«Астана» командасы өзіне жүктелген тапсырманы орындап шықты. Ендігі кезек
Алматының «Қайрат»командасына келді.
Самат Қанағатов, тілші:
Енді бірер сағаттан соң дәл осы
орталық стадионда Еуропа лигасы аясында Алматының «Қайрат»командасы Францияның
«Бордо» клубымен сынға түседі. Екі команда арасындағы алғашқы ойында «Бордо»
футболшылары 1-0 есебімен басым түсті. Енді кезек «Қайрат» командасына келіп
отыр. Егер бүгін Владимир Вайстың шәкірттері екі доп айырмашылығымен жеңіске
жететін болса, онда алматылық ұжым «Астана» командасының жетістігін қайталап, клуб
тарихында тұңғыш рет топтық кезеңге жолдама алады.
Самат
ҚАНАҒАТОВ
