«Вуэльта» көпкүндігінде «Астана» командасының капитаны италияндық
Фабио Ару жеңімпаз атанды. Сөйтіп, «қызыл
жейде» Арудың еншісіне тиді. Ал АҚШ-тың
ашық біріншілігінде өнер көрсетіп жатқан қазақстандық теннисші Ярослава Шведова
жұптасып өнер көрсету бәсекесінің ақтық сынында жеңілді. Спорт жаңалықтары
келесі топтамада.
Веложарыстан «Вуэльта»
көпкүндігі мәреге жетті. Биыл 70-ші рет жалауын көтерген бәсекеде «Астана»
командасының капитаны италияндық Фабио Ару жеңімпаз атанды. 21 кезеңге созылған
жарыс Андорра князьдігінен бастау алып, кеше
Испания астанасы Мадрид қаласында аяқталды. Велошабандоздар осы аралықта
3300 шақырым жолды артқа тастады. Сайыс барысында «Астана» командасының үміт
артқан спортшысы Винченцо Нибали жарыстан шеттетілген болатын.Командаласының
қолдауынан айрылған Ару өзіне жүктелген сенімді ақтай білді. Беделі жағынан Тур
де Франс пен Джиро дИталияға ғана жол беретін бәсекеде топ жару кез-келген
велошабандоздың арманы. Жалпы, сайыс қорытындысы бойынша жеңімпаздың «қызыл
жейдесін» «Астана» капитаны Фабио Ару
еншілесе, екінші орынды «Катюша» командасының велошабандозы испандық Хоаким
Родригес иеленді. Үздік үштікті «Тинкофф Саксо» өкілі поляк Рафал Майка
түйіндеді.
Теннистен АҚШ-та өткен «Үлкен
дулыға» бәсекесінде отандасымыз Ярослава Шведова жұптық сайыстың ақтық сынында
жеңілді. Австралиялық Кейси Деллакуамен жұптаса өнер көрсеткен Шведова швейцариялық
Мартина Хингис пен Үндістан өкілі Сания Мырзаға жол берді. Спорттық мансабында
4-ші рет «Үлкен дулыға» бәсекесінің финалына жолдама алған отандасымыз бұл жолы
да жеңілді. Бір сағат 9 минутқа созылған кездесу 3:6, 3:6 есебімен аяқталды. Қазақстандық
теннисші жұптық рейтингте 7-ші орынға көтерілсе, жекелей сында 1 саты төмендеп,
88-ші орынға жайғасты. Ал «Үлкен дулыға» бәсекесінің ерлер арасындағы сайысының
финалында әлемдік рейтинг көшбасшысы серб Новак Джокович пен швейцариялық
Роджер Федерер жолықты. Қос теннисші 3 сағаттан астам уақыт кортқа жиналған
көрермендерге керемет ойын үлгісін көрсетті. Кездесу 4 сет қорытындысы бойынша
6:4, 5:7, 6:4, және 6:4 есебімен серб спортшысының пайдасына шешілді. Осылайша
Новак Джокович өз мансабында 2-рет АҚШ біріншілігінің жеңімпазы атанды.
