Бүгін - қазақстандық футбол сүйер
қауым тағатсыздана күткен айрықша күн. Елордалық «Астана» командасы кәрі
құрлықтың басты турнирі Чемпиондар лигасындағы тұсаукесер кездесуін өткізеді.
Станимир Стойлов шәкірттері сырт алаңда Португалияның «Бенфикасына» қарсы ойнамақ.
«Да Луж» стадионындағы матч түнгі сағат 00:45-те басталады. Осы және өзге де спорт жаңалықтары келесі топтамада.
Қазақ футболында тарихи күн.
Чемпиондар лигасына жолдама алған «Астана» алғашқы кездесуін өткізеді. Португалияға мықты ойыншыларымен аттанған болгариялық маман топтық кезең жолдамасын әкелген құрамды ауыстырмайтынын, тек
аздаған өзгерістер ғана болатынын мәлімдеді.
Айта кетсек, бүгінгі кездесуге ХИК
командасымен болған ойында дөрекілігі үшін алаңнан қуылған ганалық Патрик
Твумаси қатыспайды. Жарақатына байланысты команда капитаны Таңат Нөсербаев та
алаңға шыға алмайды. Жалпы, «Астананың» Еуропа Чемпиондар лигасының топтық
кезеңіне шығуының өзі - үлкен жетістік. Дегенмен, бұдан да үлкен нәтижеге ұмтылу
қажет. Еске салайық, «Астана» «С» тобында Бенфикадан бөлек, Испанияның «Атлетикосымен» және Түріктің «Галатасарайымен»
ойнайды.
Өскеменде атақты «Реал Мадрид»
клубының тәжірибесіне сай футбол академиясы құрылатын болады. Айтулы шараға
орай облыстық спорт басқармасы испаниялық «SOXNA» консалтингтік компаниясымен
келісімшарт жасасты. УЕФА-ның арнайы сертификаты бар Пиреней түбегінің 7
бапкері 6 мен 16 жас аралығындағы балаларды жаттықтырады. Отандық ала доп
мамандары олармен тәжірибе алмасатын болады. Ауыл-аймақтардан шыққан дарынды
балаларға интернатта 100 орын қарастырылған. Жергілікті жердің климатына
байланысты қыста да жаттығу жасайтын жабық футбол алаңдары салынбақ. Айта
кетейік, Қазақстан - әлемдегі үздік футбол академиясының бөлімшесі ашылған 10-шы
ел.
Алсина Луис, «SOXNA» компаниясының
президенті, Испания:
Нәтиже көп күттірмейді, біздің
жылдар бойы сынақтан өткен тәжірибеміз бар. Испан футболының тарихы
бай. Біз әлемдік додаларда топ жарудың
қыр-сырын білеміз. Сіздерде талантты ойыншылар жетерлік, сол дарын иелерінен болашақта
Месси сынды жұлдыздарды тәрбиелеп
шығарамыз.
Осылайша, Өскемендегі футбол
академиясынан бірнеше жылдан соң халықаралық ареналарда доп тебетін талантты
футболшыларды тәрбиелеп шығармақ. Бұл елдегі нөмірі бірінші спорт түрін жоғары
деңгейге көтерері анық.
