Қарағанды облысында тағы үш елді мекен
су астында қалуы мүмкін. Өңірдің төтенше
жағдайлар қызметі аймақта ауылдарды су басу қаупі күшейгенін хабарлады. Тіпті
жақын күндері тұрғындар қауіпсіз жерлерге көшірілуі мүмкін.
«Қазгидромет»-тің мәліметтеріне
қарағанда, Үлкен Құндызды өзеніндегі су белгіленген мөлшерден 96 см-ге
көтерілген. Ал Нұра өзеніндегі су Шешенқара
кенті және Балықты теміржол стансасы маңында қауіпті деңгейге жетті. Бұдан соң
төтеншеліктер тұрғындарға заттарды жинап, азық-түлік,ауыз суды қамтып, газ және
электр желілерін ажыратып көшуге дайын отыруды ескертуде.
Айта өтейік, бұған дейін осы өңірдегі
Көкпекті ауылын су басып, 5 адам қаза болды. Қазір
апат аймағын қалпына келтіру шаралары жүріп жатыр. Бұған мыңға тарта адам
жұмылдырылған. Осы күнге дейін ауылдан 560 тонна қоқыс шықты. Сондай-ақ, 500-ге
жуық арам қатқан мал да ауылдан шығарылды. Бүгін Көкпектіде қапияда қаза болған
тұрғындарды қара жерге тапсырады.
Илхам ИБРАГИМ
