Ихтиоз дертіне шалдыққан қызылордалық бүлдіршін науқасынан толық айығып
кетпейді. Жасұланға ем жасап жатқан алматылық дәрігерлер осылай деді. Бес
жастағы ұлының дертімен жалғыз арпалысып жүрген Ұлбибі Ықыласова шетелге баруға
ықыласты екені бұдан бұрын хабарланған. Қазір Әзірбайжанға барып шипа іздеуге
қажетті сомма да жиналған. Бірақ қазақстандық мамандар мұның бос әурешілік
екенін айтумен шектеліп отыр. Екі күн бұрын Алматыдағы тері-венерологиялық
ғылыми институтқа жатқызылған науқастың қал-жағдайын біздің тілшілер де біліп
қайтты.
Өмір болған соң, құдай берді. Осымен күресесің енді. Баланы да үйрету
керек. Ол енді кішкентай емес.
Білікті дәрігер азапқа түскен ананы осылайша жұбатады. Тері аурулары
бойынша отандық ғылыми зерттеу институтының профессоры, бұл аурудың сирек
екенін мойындап отыр. Жасұланға жабысқан дерттің шипасынан әуресі көп. Әсіресе
күн жылынған кезде бала денсаулығына қауіп күшейеді. "Ал ойын баласын ылғи үйде
қамап ұстау мүмкін емес", - дейді анасы.
Ұлбибі Ықыласова, анасы:
Күн жылынып, қатты ысығанда, жағдайы нашарлайды. Оған дейін үйде де
жақсымыз. Бірақ көп шығарғым келмейді. Құрғап кетсе, іріп кетеді.
Жасұланның дерті жайында қоғамдық пікір күшейген соң, ата-анасы Алматыдағы
ауруханаға жеткізген. Бүлдіршін осыған дейін республикалық тері аурулары
институтында бір рет ем қабылдаған. Нәтиже болмаған соң, отбасы шетелдік
клиникаларға хабарласады. Израиль қомақты қаражат талап етсе, жақанырақ
орналасқан Әзірбайжан 1,5 млн теңгеге емдейміз деп үміттендірген.
Ұлбибі Ықыласова, анасы:
Барып келгенмен, қайта шығатын ауру. Менің үмітім - кішкене жеңілдей ме, ұзақ
уақыт шықпай тұра ма деген ниетпен барғым келеді. Олар негізі жыл сайын бер рет
келіп тұрасыңдар деген.
Құрсағын жарып шыққан сәбидің дерті жанына батқан ана ем іздеуден жалықпақ
емес. Жерлестері де Бакуге бару үшін қажетті сомманы жинап берген. Енді
Алматыдағы институттың көмегімен қажетті сараптамалар қорытындысы жасалады.
Сосын сапар күтіп тұр.
Зейнеп Есенғараева, медицина ғылымдарының докторы, профессор:
Әке-ана бір жерге апарсам, жақсы болар деп үміттенеді. Бірақ ол уақытша
ғана тазаланады. Сосын қайтадан шығады. Өзі денесін таза ұстамаса, шыға береді.
Біздің планетада оны әлі ешкім емдей алған жоқ.
Еліміздің денсаулық сақтау министрлігі де ерекше науқастың жағдайынан
хабардар екен. "Қолдан келетіні - білікті клиникаларда емделуге тегін жолдама
беру", - дейді министр. Бірақ квота алу үшін тиісті құжаттар рәсімделуі қажет.
Салидат Қайырбекова, ҚР Денсаулық сақтау министрі:
Иа, біз бұл туралы ақпаратты арнайы алдыртып, таныстық. Мұндай науқастар
саны балалар арасында 200-ден асады. Олар барлық аймақтарда кездеседі. Егер
қызылордалық баланың ата-анасы өтінішін жолдаса, біз көмектесеміз. Бірақ бұл
отбасы бізден квота сұраған емес.
Венеролог дәрігерлер Қазақстанда ихтиозға шалдыққан 475 адам тіркелгенін
айтады. Тек Қызылорда облысының өзінде 46 науқас бар. Айтуларынша Жасұланға
оның ең ауыр түрі жабысқан. Денені қаулап кеткен қабыршықтан бүлдіршінді
арашалап алу үшін отбасы күресе бермек.
Ришат АСҚАРБЕКҰЛЫ
