"Самұрық-Қазына"
әл-ауқат қоры биыл құны 3 миллиард доллар болатын он алты жобаны тапсырады. Оның
ішінде Атырау мұнай өңдеу зауытында күрделі жөндеу жұмыстарын аяқтау жобасы да
бар. Зауыт осыдан кейін Еуро-4, Еуро-5 талаптарына сай жанармай шығара
бастайды.
Бүгін қор басшылығы ірі жобаларға инвестиция тарту мәселесін
талқылады. Қазіргі таңда "Самұрық-Қазына" жалпы құны 146 миллирад
долларға тең 163 жобаны жүргізіп отыр. Жобаларға құйылған әр долларға қосымша
үш доллар инвестиция тартылған. Өткен екі жыл ішінде "Самұрық-Қазына"
компаниялар тобы 4,3 миллиардқа 29 жобаны іске қосты. Нәтижесінде 10 мың жұмыс
орны ашылған. Ірі жобалар қатарында Мойнақ су электр стансасы, Жетіген-Қорғас,
Өзен-Түркіменстан шекарасын жалғаған темір жол желісі, локомотив, электровоз
құрастыру зауыттары мен аффинаж зауыты бар.
Берік Бейсенғалиев
"Самұрық-Қазына"ҰӘҚ" АҚ бизнесті дамыту жөніндегі бас директоры,
басқарма мүшесі:
Ерейментаудағы желмен
жүретін электростанция 45 МегаВатт күш қуаты бар. Жылдың аяғына дейін іске
қосамыз. Кейін ол "Экспо"-ны электр энергиямен қамтамасыз ететін
болады. Тағы да біз арқылы жасыл орам үлкен аймақта 135 шаршы метрде салынып
жатыр. Жартысы тұрғын үй, жартысы коммерциялық обьектілер. Өзгешелігі - обьектілердің барлығы инновациялық материалдардан.
Мөлдір БАҚЫТ-ҚЫЗЫ
