12 маусым күні Бразилияда футболдан Әлем чемпионаты басталады. Басты доп
додасының шымылдығын ашатын ойында жарыс иелері Бразилия және Хорватия
командалары сынға түседі. Бұл кездесуде Юити Нисимура бастаған жапондық
төрешілер қазылық жасайды. Спорт тақырыбы алдағы топтамада.
Шайбалы хоккейден Қазақстан ұлттық құрамасының бас бапкері Ари Пекка Селин
мен бас менеджер Нұрлан Оразбаев орындарын босатты. Бұдан былай мамандар тек
«Барыс» хоккей клубында қызмет атқарады. Бұл ақпарат Қазақстан хоккей
федерациясының атқару комитетінің отырысында белгілі болды. Ел құрамасы
Беларусь астанасы Минск қаласында өткен Әлем чемпионатында сәтсіз өнер
көрсетті. 7 кездесудің барлығында қарсыластарына жол берген Ари Пекка Селиннің
шәкірттері элиталық дивизионмен қош айтысты.
Ал, Құрлықтық хоккей лигасында сынға
түсіп жатқан «Барыс» клубы маусымды нәтижелі аяқтады. «Шығыс» конференциясында
екінші орынға көтерілген қазақстандық ұжым клуб тарихында алғаш рет плей-офф
ойындарының алғашқы айналымынан сүрінбей өтті.
Велоспортан «Дофине Либере» көпкүндігі жалғасуда. Дәрежелі жарыстың 3-кезеңі Амбер және Ле Тей қалаларының арасында өтті. Бұл сында алдына жан
салмаған Германия спортшысы Никас Арндт жеңіске жетті. 194 шақырымнан тұратын
жарыс жолын «Жиан Шимано» клубының өкілі 5 сағат 30 минутта бағындырды. Жеңімпазбен
бір уақыт көрсеткен «Лотто Белисол» клубының спортшысы бельгиялық Крис Бекман
екінші орынды иеленсе, үшінші сатыны Оңтүстік Африка мемлекетінің спортшысы Янсе ван Ренсбург еншіледі.
«Астана» командасының спортшылары Якуб Фульсанг,
Танел Кангерт және Винченцо Нибали жарысты пелатонның ішінде аяқтады. Жалпы
есепте өзгеріс жоқ. Үш кезеңнен кейін «Скай» командасының капитаны Кристофер
Фрум жарыс лидерінің сары жейдесін сақтап қалды. Көшбасшыдан 12 секундқа қалып
тұрған испаниялық Альберто Контадор екінші орында болса, үшінші сатыны
голландиялық Уилко Кельдермен еншіледі. «Астана» командасының капитаны Винченцо
Нибали 6-орнын сақтап қалды. Ол Форумға 3 кезеңнен кейін небәрі 50 секунд
ұтылып келеді.
Самат ҚАНАҒАТОВ
