Алматыда жетім балалар арасында футболдан жарыс өтті. Ақтық ойында
Алматы облысының аяқдопшылары қарсыластарын қапы қалдырып, Италия еліне бару жолдамасын жеңіп алды. Олар финалдық кездесуде Жамбыл облысының құрамасын 5:1 есебімен жеңді. Балғындар ойын кубогымен қоса, көптеген бағалы сыйлықтарға ие болды.
Ал ең басты сыйлық Италияның Милан қаласына
сапарлау болмақ. Алдағы тамыз айында жас жеткіншектер әйгілі«Милан» клубын көруге барады. Сондай-ақ атақты Сан-Сиро стандионында аталған клубтың
ойыншыларымен кездеспек. Естеріңізге салайық, «Арманыңа жақында» атты бұл футбол турнирі мамыр айында басталған.
Жарыста еліміздің барлық аймағынан 20
команда бақ сынасты.
Ата-ана қамқорлығынсыз қалған балалар арасындағы футбол турнирі "Нұр Отан" партиясының қолдауымен өтті. Ұйымдастырушылар, келесі жылы да теңбіл доп турнирін жалғастырмақ. Ол кезде жарыс жеңімпаздары
футболдың отаны - ағылшын еліне барады деп жоспарланып отыр. Қазірдің өзінде екі жақсы келісімдер басталып кетті.
Жұлдыз
Омарбекова, «Бауыржан» қайырымдылық қорының президенті:
Биылғы жаңалығымыз профессионалды футболшыларды шақырып, осы жетімдер арасында Кака, Мальдины сияқты, Қазақстанның футболын биікке шарықтататын
осындай футболшылар бар шығар деп, шақырып отырмыз. Олар ойынға қарап ең жақсы-жақсы ойнайтын балаларды таңдап алып, өзінің спорт мектебіне алып кетеді. Сосын айтамыз, бір баланың өмірін жақсартсақ, біз үшін үлкен жеңіс.
Данияр ӘЛІМҚҰЛ
