Лондон олимпиадасының чемпионы Майя Манеза жоғарғы оқу орнын
бітіріп, дипломға ие болды. Спортшы Алматыдағы қыздар педагогикалық
университетінде «дене шынықтырудан жаттықтырушы» мамандығы бойынша білім алған.
Бүгін
университет басшылығы зілтеміршіге бакалавр дәрежесіндегі дипломды және ел
спортына сіңірген еңбегі үшін алғыс хатты ресми түрде табыстады.
Майя өз
кезегінде оқуын жалғастыратынын айтады. Ол алдағы күндері осы оқу орнының
магистратурасына құжаттарын өткізбек. Сондай-ақ Олимпиада чемпионы алдағы
уақытта спорттағы карьерасын жалғастырмақ. Жақында Қытайда басталатын
жаттығуларға қатысып, әлемдік додаларда Қазақстан атынан сынға түседі.
Майя Манеза, Лондон олимпиадасының чемпионы:
Мен осында оқығаныма және оны
абыроймен бітіргеніме қуанып тұрмын. Мен
университеттің ректорына жеке алғыс білдіремін. Сол сияқты өзіме сабақ берген
ұстаздарға да ризамын. Алдағы уақытта білім алуды жалғастырамын.
Зәуреш Сабырова, Қазақ мемлекеттік қыздар институтының
проректоры:
Иа, Манеза өз
сөзінде оқуды жалғастыратынын айтады. Біз оны қолдаймыз. Және алдағы уақытта
көмек қолын созуға әзірміз.
Ришат АСҚАРБЕКҰЛЫ
